Հայաստանի երիտասարդ բասկետբոլիստները նվաճեցին Եվրոպայի չեմպիոնի կոչումը

Վճռորոշ խաղում մեր թիմը 97:68 հաշվով տպավորիչ հաղթանակ է տոնել Մալթայի հասակակիցների նկատմամբ: Հայաստանի ընտրանին սեփական հարկի տակ անցկացրած մրցաշարում հանդես է եկել առանց որևէ ձախողման՝ տանելով 6 հաղթանակ անցկացրած 6 խաղում:

Հայաստանի մինչև 16 տարեկանների թիմի բասկետբոլիստ Էնթոնի Սարգսյանը ճանաչվել է Երևանում կայացած Եվրոպայի Մ16 տարեկանների C դիվիզիոնի առաջնության ամենաարժեքավոր խաղացող (MVP)։ Դրանից բացի, Էնթոնին տեղ է գտնել մրցաշարի խորհրդանշական հնգյակում (All-Star Five)՝ վերահաստատելով, որ հանդիսացել է առաջնության առաջատար բասկետբոլիստներից մեկը։ Մրցաշարի շրջանակում Սարգսյանն աչքի է ընկել միջինը 21.0 միավորով, 14.8 ռեբաունդով, 2.5 արդյունավետ փոխանցմամբ և 36.0 արդյունավետության գործակցով (EFF)՝ զգալի ավանդ ունենալով Հայաստանի հավաքականի չեմպիոնական ու անպարտելի մրցելույթներում։

Հայաստանի ընտրանուց խորհրդանշական հնգյակում տեղ է գտել նաև Էթան Կազանչյանը, ում միջին ցուցանիշներն են՝ 21.8 միավոր, 2.5 ռեբաունդ, 5.6 արդյունավետ փոխանցում և 21.3 արդյունավետության գործակից (EFF)։