Համաճարակային նոր սպառնալիք․ Հանտավիրուսը տարածվում է՝ կոչ են անում զգոն լինել

Հունաստանի հանրային առողջապահության ազգային կազմակերպությունը (EODY) հանդես է եկել հայտարարությամբ՝ կոչ անելով քաղաքացիներին հատուկ զգուշավորություն ցուցաբերել կրծողների հնարավոր առկայությամբ տարածքների մաքրման ժամանակ։ Ըստ երկրի առողջապահության նախարարության ենթակայությամբ գործող կառույցի՝ վարակի կանխարգելման հիմնական միջոցներից է այն շինությունների ախտահանումը, որտեղ կարող են հայտնվել կրծողներ։

Մասնագետները պարզաբանում են, որ Հանտավիրուսի փոխանցման առավել տարածված եղանակը վարակված կրծողների կենսագործունեության արգասիքների (մեզ, կղանք, թուք) մանր մասնիկներ պարունակող օդի շնչումն է։ Վիրուսը կարող է երկար ժամանակ պահպանել իր վտանգավորությունը չորացած նյութերում։ Մաքրման ընթացքում փոշու բարձրացման հետևանքով այդ մասնիկները հեշտությամբ հայտնվում են մարդու շնչառական համակարգում, ինչն էլ հանգեցնում է վարակման։

Առողջապահական այս նախազգուշացումները հաջորդել են Արգենտինայից Կաբո Վերդե ուղևորվող նիդերլանդական «MV Hondius» կրուիզային նավում բռնկված համաճարակին։ Վերջին տվյալներով՝ նավի վրա հայտնաբերված վարակակիրների թիվը հասել է 13-ի, որոնցից 3-ը մահացել են։ Առողջապահության համաշխարհային կազմակերպության ղեկավար Թեդրոս Ադհանոմ Գեբրեյեսուսը հաստատել է հիվանդացության դեպքերի աճի միտումը։

Հաշվի առնելով վարակի տարածման ռիսկերը՝ մասնագետները խորհուրդ են տալիս առանձնակի ուշադրություն դարձնել փակ տարածքների, պահեստների, նկուղների, ամառանոցների և գյուղատնտեսական նշանակության օբյեկտների հիգիենիկ վիճակին ու կանոնավոր օդափոխությանը։