Հայտնի է՝ երբ կկայանա Պուտին-Զելենսկի հանդիպումը․ Պեսկով

Ռուսաստանի նախագահի մամուլի քարտուղար Դմիտրի Պեսկովը հայտնել է Վլադիմիր Պուտինի պատրաստակամությունը՝ Մոսկվայում ընդունելու Ուկրաինայի նախագահ Վլադիմիր Զելենսկուն։

Ինչ վերաբերում է Մոսկվայից դուրս հնարավոր հանդիպմանը, ապա այն կարող է կայանալ միայն հակամարտության վերջնական հանգուցալուծման և համապատասխան փաստաթղթերի ստորագրման նպատակով։ Պեսկովը շեշտել է, որ այլ վայրում հանդիպելու համար անհրաժեշտ է նախնական լուրջ աշխատանք, որպեսզի կողմերը կարողանան արձանագրել գործընթացի ավարտը։

Խոսելով ռազմական գործողությունների մասին՝ մամուլի քարտուղարը նշել է, որ հումանիտար հրադադարի ժամկետն սպառվել է, և հատուկ ռազմական գործողությունը շարունակվում է։ 

Ըստ նրա՝ գործողությունները կարող են դադարեցվել ցանկացած պահի, եթե Կիևի իշխանությունները կայացնեն համապատասխան որոշումներ ու ստանձնեն անհրաժեշտ պատասխանատվությունը։ Մոսկվան վերահաստատում է, որ ուկրաինական կողմին հայտնի են այն պահանջներն ու պայմանները, որոնց կատարումը հնարավորություն կտա դադարեցնել զինված բախումը և հասնել վերջնական համաձայնության։