ՏԵՍԱՆՅՈՒԹ. Ես ստանձնում եմ Փաշինյանին աջակցելու պարտավորությունը, ինչպես Սանդուի դեպքում. Մակրոն

Ֆրանսիայի նախագահ Էմանուել Մակրոնը հաստատել է իր աջակցությունը ՀՀ վարչապետ Նիկոլ Փաշինյանին՝ ընդգծելով Մոսկվայի պատվերով իրականացվող օտարերկրյա միջամտությունների առկայությունը։

ԶԼՄ-ների հետ հարցուպատասխանի ընթացքում Ֆրանսիայի նախագահ Էմանուել Մակրոնը պատասխանել է այն հարցին, թե արդյո՞ք իր աջակցությունը չի դիտարկվում որպես օտարերկրյա միջամտություն Հայաստանի սպասվող խորհրդարանական ընտրություններին՝ հաշվի առնելով Ռուսաստանի հնարավոր միջամտության մասին իր իսկ մտահոգությունները։

Մակրոնը նշել է, որ ստանձնում է Փաշինյանին աջակցելու պարտավորությունը, ում վստահում է արդեն 8 տարի։ Նա զուգահեռներ է անցկացրել Մայա Սանդուի հետ՝ շեշտելով, որ վերջինս նույնպես դիմակայում էր ոչ եվրոպական ընտրությանը։ Ֆրանսիայի նախագահի խոսքով՝ ինքը լիովին ստանձնում է Եվրոպան և եվրոպական որոշումները պաշտպանելու որոշումը։

Նախագահը պարզաբանել է տարբերությունը՝ ընդգծելով, որ կան միջամտություններ, որոնք ԶԼՄ-ների և կեղծ տեղեկատվության միջոցով փորձում են ապակայունացնել իրավական պետությունն ու մանիպուլյացիայի ենթարկել ժողովրդավարական կյանքը։

«Այստեղ բաց երեսով միջամտություն է, և հակառակը՝ կան միջամտություններ օտարերկրյա գործակալների կողմից՝ Մոսկվայի պատվերով, որոնք փորձում են կեղծել ժողովրդավարությունը, ես տալիս եմ իմ փաստարկները և մասնակցում եմ ժողովրդավարությանը որպես Ֆրանսիայի նախագահ, ես չեմ կեղծում, կարևոր է դա հիշել»,- հայտարարել է Էմանուել Մակրոնը։

Ավելին` տեսանյութում: