Դանիան ռազմական տեխնիկա և հրամանատարական անձնակազմ է ուղարկել Գրենլանդիա
Դանիայի պաշտպանության նախարարությունը Գրենլանդիա է ուղարկել ռազմական տեխնիկա և առաջավոր հրամանատարական անձնակազմ՝ հնարավոր ավելի մեծ զորախմբի տեղակայմանը նախապատրաստվելու նպատակով։ Տեղեկությունը հաղորդել է Դանիայի հանրային ռադիոն՝ հղում անելով անվտանգության կառույցների աղբյուրներին։ Այս մասին գրում է Ведомости-ն։
Ուղարկված առաջավոր ստորաբաժանման հիմնական խնդիրն է ապահովել լոգիստիկական և ենթակառուցվածքային պատրաստվածությունը՝ հիմնական ուժերի ընդունման համար։ Այս քայլը դիտարկվում է որպես նախնական փուլ՝ տարածաշրջանում ռազմական ներկայության ընդլայնման համատեքստում։
Հավելենք՝ ավելի վաղ Գրենլանդիայի մայրաքաղաքի օդանավակայանում վայրէջք է կատարել Դանիայի ռազմաօդային ուժերին պատկանող Challenger տիպի ռազմատրանսպորտային ինքնաթիռը։ Թեև պաշտոնապես չի հայտարարվել, որ թռիչքը կապված է կղզու պաշտպանության ուժեղացման հետ, պաշտպանության նախարար Տրոելս Լունդ Պոուլսենը խորհրդարանական հանձնաժողովում փակ ճեպազրույցից հետո հայտարարել է տարածաշրջանում մշտական ռազմական ներկայությունը մեծացնելու ծրագրերի մասին։
Նրա խոսքով՝ Դանիան նախատեսում է ոչ միայն սեփական զինված ուժերի, այլև գործընկեր երկրների մասնակցությամբ ընդլայնել ներկայությունը Գրենլանդիայում՝ արձագանքելով Արկտիկայում ձևավորվող մարտահրավերներին։ Միևնույն ժամանակ, միջազգային մամուլում նշվում է, որ Դանիայի և Գրենլանդիայի արտգործնախարարները մտադիր են ԱՄՆ վարչակազմի հետ քննարկումների ընթացքում անդրադառնալ կղզու շուրջ հնչող քաղաքական նախաձեռնություններին։
