Ավելի քան 180 անօրինական ներգաղթյալներ Բելառուսից Լեհաստան են մտել թունելով
Ավելի քան 180 անօրինական միգրանտներ Բելառուսից Լեհաստան են մտել Նարևկա գյուղի մոտ փորված ստորգետնյա թունելով։ Այս մասին հայտնել է Լեհաստանի սահմանապահ ծառայությունը։ Դրա սպաները, զինվորականների և ոստիկանության աշխատակիցների հետ միասին, ձերբակալել են նրանցից ավելի քան 130-ին, իսկ մնացած միգրանտների որոնումները շարունակվում են։
«Մի քանի տասնյակ մետր երկարությամբ և ցանկապատի ու տեխնիկական ճանապարհի տակով անցնող թունելը մոտավորապես 1,5 մետր բարձրություն ուներ։ Դրա մուտքը, որը թաքնված էր անտառում, գտնվում էր սահմանի բելառուսական կողմից մոտավորապես 50 մետր հեռավորության վրա, իսկ ելքը՝ լեհական կողմի ցանկապատից մոտավորապես 10 մետր հեռավորության վրա», - ասել է Լեհաստանի սահմանապահ ծառայության խոսնակ, փոխգնդապետ Անջեյ Յուժվյակը։
Նրա խոսքով՝ էլեկտրոնային հսկողության համակարգերը ցույց են տվել, որ ավելի քան 180 օտարերկրացիներ «կարճ ժամանակահատվածում» օգտվել են թունելից։ Ձերբակալվածների մեծ մասը Աֆղանստանի և Պակիստանի քաղաքացիներ էին, իսկ երկիր են մուտք գործել նաև Հնդկաստանի, Նեպալի և Բանգլադեշի անձնագրեր ունեցող անձինք։
