Պակիստանի վարչապետի ուղերձը Հնդկաստանին
Հնդկաստանը պետք է քաղաքական կամք ցուցաբերի Ջամմուի և Քաշմիրի հարցի դիվանագիտական լուծման համար։ Այս մասին Պակիստանի վարչապետ Շահբազ Շարիֆը հայտարարել է Անկախության օրվա կապակցությամբ ազգին ուղղված իր ուղերձում։
«Պակիստանը հաղթեց մայիսի 6-10-ի պատերազմում, որը սկսվեց հնդկական ագրեսիայի պատճառով։ Սա ոչ միայն ամրապնդեց ազատության իմաստը, այլև նոր ձգտումներ և ոգևորություն առաջացրեց պակիստանցիների սրտերում։ Պակիստանի բանակի ռազմական հզորությունն ու հերոսությունը թշնամիներին ծնկի բերեցին», - նշել է Պակիստանի վարչապետը։
Նա ասել է, որ Պակիստանը կշարունակի վճռականորեն պաշտպանել իր ինքնիշխանությունը և հավատում է տարածաշրջանային և համաշխարհային խնդիրները երկխոսության և դիվանագիտության միջոցով լուծելու հնարավորությանը։
«Հնդկաստանը պետք է նույն կամքը ցուցաբերի բոլոր խնդիրները լուծելու համար, այդ թվում՝ Ջամմուի և Քաշմիրի շուրջ հակամարտությունը», - ասել է վարչապետ Շահբազ Շարիֆը։
