Խոշոր հրդեհ Իրանում. կան զոհեր
Իրանի հարավային Բուշեր նահանգի Դեյր քաղաքի քիմիական և վառելիքի վերամշակման նավահանգստում հրդեհ է բռնկվել։ Իրանական լրատվական գործակալությունները հայտնում են, որ հրդեհը բռնկվել է նավթաքիմիական համալիրին պատկանող նավամատույցում։
Պետական IRNA լրատվական գործակալությունը հաղորդում է, որ մեթանոլի պահեստում բռնկված հրդեհի հետևանքով երեք մարդ զոհվել է, ևս տասը վիրավորվել են։ Հրդեհի պատճառը դեռևս չի պարզվել, և դեպքի վայրում աշխատում են արտակարգ ծառայություններն ու մասնագետները։
Հավելենք՝ Դեյրի նավահանգիստը տարածաշրջանի կարևորագույն հանգույցներից է նավթաքիմիական նյութերի վերամշակման և արտահանման համար: Տեղական իշխանությունների տվյալներով՝ հրդեհը տեղայնացվել է, սակայն վնասի գնահատումը և միջադեպի հետաքննությունը շարունակվում են:
Ավելի վաղ գործակալությունը գրել էր, որ Իսլամական հեղափոխության պահապանների կորպուսի հրամանատար Հոսեյն Սալամին կոշտ հայտարարություն է արել Իսրայելի դեմ՝ ընդգծելով, որ Իրանի քաղաքականությունը «սիոնիստական ռեժիմի» նկատմամբ չի փոխվի նույնիսկ եթե Միացյալ Նահանգների հետ նոր միջուկային համաձայնագիր կնքվի։
«Նույնիսկ եթե միջուկային համաձայնագիր կնքվի, մեր թշնամանքը սիոնիստական ռեժիմի նկատմամբ չի դադարի։ Հաղթում է նա, ով կարող է դիմակայել ճնշմանը», -ասել է հրամանատարը։
