Զելենսկին և եվրոպացի առաջնորդները հանդիպել են

Լոնդոնում մեկնարկել է Ուկրաինայի հարցով եվրոպացի առաջնորդների գագաթնաժողովը, որը կազմակերպել է Մեծ Բրիտանիայի վարչապետ Քիր Սթարմերը։ Այս մասին գրում է Meduza–ն:

Քիր Սթարմերը ընթացիկ գագաթնաժողովն անվանել է «սերունդների մեջ մեկ անգամ պատահող պահ» եվրոպական անվտանգության համար՝ հավելելով, որ Ուկրաինայի համար լավ խաղաղ արդյունքը կենսական նշանակություն կունենա մայրցամաքի բոլոր երկրների համար:

Գագաթնաժողովը տեղի է ունենում Լոնդոնի կենտրոնական Լանկաստեր-Հաուսում, որին ներկա են եվրոպական գրեթե բոլոր երկրների ղեկավարները՝ Ֆրանսիայի նախագահ Էմանուել Մակրոնը, Գերմանիայի կանցլեր Օլաֆ Շոլցը, Իտալիայի վարչապետ Ջորջիո Մելոնին, ինչպես նաև Լեհաստանի, Չեխիայի, Ռումինիայի, Նիդեռլանդների, Դանիայի, Շվեդիայի, Նորվեգիայի, Ֆինլանդիայի և Կանադայի ղեկավարները: Բացի այդ, գագաթնաժողովին մասնակցել են նաև Թուրքիայի արտգործնախարար Հաքան Ֆիդանը, Եվրահանձնաժողովի ղեկավար Ուրսուլա ֆոն դեր Լյայենը և ՆԱՏՕ-ի գլխավոր քարտուղար Մարկ Ռյուտեն։

Գագաթնաժողովին մասնակցում է նաև Ուկրաինայի նախագահ Վլադիմիր Զելենսկին, ով նախօրեին առանձին հանդիպում է ունեցել Քիր Սթարմերի հետ՝ ԱՄՆ նախագահ Դոնալդ Թրամփի հետ վիճաբանությանը հաջորդած այցով։