Հայտարարում ենք Թուրքիայի հետ հրադադարի մասին. ՔԱԿ

Թուրքիայում ահաբեկչական ճանաչված Քրդստանի աշխատավորական կուսակցությունը (PKK, ՔԱԿ) հայտարարել է Թուրքիայի հետ հրադադարի մասին՝ ի պատասխան իր առաջնորդ Աբդուլլահ Օջալանի կոչին:

Թուրքիայի քրդամետ DEM կուսակցության ներկայացուցիչները 2 օր առաջ ընթերցել են բանտում ցմահ պատիժ կրող PKK-ի առաջնորդ Աբդուլլահ Օջալանի՝ խմբավորման զինյալներին ուղղված դիմումը ՝ լուծարելու եւ զինաթափելու կոչով։ Քրդական PYD (Ժողովրդավարական միություն կուսակցություն) զինված ջոկատները դրանից հետո հայտարարել են, որ պատրաստ են վայր դնել զենքը, եթե իրենց թույլ տան քաղաքական գործունեություն ծավալել Թուրքիայում:

Թուրքիայի կառավարությունը հույս ունի, որ ՔԱԿ-ի լուծարումը կտևի երկու-երեք ամիս, հաղորդում է CNN Türk-ը հղում անելով իր աղբյուրներին:

«Մենք համաձայն ենք (Օջալանի - խմբ.) կոչի բովանդակությանը և հայտարարում ենք, որ մեր կողմից հետևելու և կատարելու ենք դրա պահանջները։ Հայտարարում ենք հրադադարի մասին՝ սկսած շաբաթ օրվանից», - մեջբերում է թուրքական AHaber հեռուստաալիքը PKK ղեկավար կոմիտեի հայտարարությունը։

Թուրքիայի նախագահ Ռեջեփ Թայիփ Էրդողանը երեկ PKK -ի լուծարման կոչի ֆոնին հայտարարել է, որ երկրում առանց ահաբեկչության «նոր էջ է բացվել»: