Զելենսկին խոսել է Մակրոնի և ՆԱՏՕ-ի գլխավոր քարտուղարի հետ
Ուկրաինայի նախագահ Վլադիմիր Զելենսկին հեռախոսազրույց է ունեցել Ֆրանսիայի նախագահ Էմանուել Մակրոնի հետ, այս մասին Financial Times-ի լրագրող Քրիստոֆեր Միլլերին հայտնել է Ուկրաինայի առաջնորդին մոտ կանգնած աղբյուրը։
Թե ինչի մասին են նրանք խոսել, չի հաղորդվում։ Ելիսեյան պալատը հաստատել է, որ Զելենսկու և Մակրոնի խոսակցությունը տեղի է ունեցել։ Դրա բովանդակությունը դեռ չի հաղորդվում։
«Զելենսկին ներկայումս շփվում է ՆԱՏՕ-ի գլխավոր քարտուղար Մարկ Ռյուտեի հետ»,- ասել է Միլլերի աղբյուրը։
Ուկրաինայի նախագահ Վլադիմիր Զելենսկին փետրվարի 28-ին ժամանել է ԱՄՆ։ Սպասվում էր, որ այս այցի ընթացքում կստորագրվի ուկրաինական հողային ռեսուրսների օգտագործման մասին պայմանագիրը։
Ինչպես հայտնում է BFM TV-ն, ԱՄՆ նախագահ Դոնալդ Թրամփը ցանկացել է չեղարկել Զելենսկու այցը, սակայն Էմանուել Մակրոնը միջամտել է և խնդրել Թրամփին չչեղարկել հանդիպումը։
Զելենսկին և Թրամփը Սպիտակ տանը բանակցություններ են անցկացրել, որի ընթացքում առաջնորդները վիճել են ռուս-ուկրաինական պատերազմի շուրջ։ Արդյունքում Թրամփը հայտարարել է, որ Զելենսկին «պատրաստ չէ խաղաղության», և ուկրաինացի առաջնորդը լքել է Սպիտակ տունը։ Բնական ռեսուրսների մասին համաձայնագրի ստորագրումը չեղարկվել է։
