Օպերայի տարածքում սրճարան է ապամոնտաժվել
Այսօր ապամոնտաժվել է Սայաթ-Նովա 2/2 հասցեում գտնվող սրճարանը։ Այս մասին հայտնել է Երևանի քաղաքապետ Տիգրան Ավինյանը, ով նույնպես ներկա էր և հետևում էր աշխատանքների ընթացքին։
«Մոտ 1000 քմ տարածքի վրա քանդման աշխատանքներ են իրականացվում։ Այս հատվածն ամբողջապես վերափոխվելու է ավելի կանաչ տարածքի, և վարձակալը չի շարունակելու իր պայմանագիրը։ Նա հանձնել է ամբողջ տարածքը քաղաքին»,- ասել է Ավինյանը:
Նա նաև նշել է, որ տարիների ընթացքում Օպերայի շուրջ եղած կանաչ հատվածները էականորեն նվազել են, և ավելացել են սրճարանները:
«Մի քանի տարի առաջ արդեն իսկ սկսվել էին Օպերայի շրջակայքում մասնակի քանդման աշխատանքներ, իսկ այսօր արդեն իրականացնում ենք սկսված գործի շարունակությունը։ Եվ փուլ առ փուլ տարբեր հատվածներ մաքրելու ենք ընդհանուր սրճարաններից, և ավելի շատ կանաչապատ հատվածներ ենք ունենալու»,- եզրափակել է Ավինյանը։
