«Չենք կարող խոստանալ, որ կամուսնանաք՝ առանց ժամադրությունների». ԵԽ պատգամավորը` Մամիջանյանին
ՀՀ-ԵՄ խորհրդարանական գործընկերության կոմիտեի նիստին ԱԺ «Պատիվ ունեմ» խմբակցության ղեկավար Հայկ Մամիջանյանը, անդրադառնալով ՀՀ-ի ԵՄ անդամակցության գործընթացին, ընդգծեց. «Այս գործընթացը կարող է հանգեցնել շատ բարձր ակնկալիքների, բայց վերջիվերջո սա կարող է դառնալ խնդիր բոլորիս համար, որովհետև բնակչությունը հիմա որոշակի հայտարարությունների պատճառով կարծում է, որ մենք կլինենք ԵՄ-ի անդամ պետություն»:
Մամիջանյանին արձագանքեց ԵԽ պատգամավորը՝ նշելով. «Երբ խոսքը գնում է ՀՀ-ի ԵՄ-ին անդամակցելու նպատակի մասին, պետք է հասկանանք, որ մենք չենք կարող խոստանալ, որ կամուսնանաք՝ առանց ժամադրությունների: Կարող ենք մեր առաջ նպատակը տեսնել, ցանկանալ, բայց կան շատ բաներ, որոնք կարող են տեղի ունենալ, որոնք անկանխատեսելի են: Մենք էլ աշխատանք ունենք անելու»:
Հիշեցնենք` Ազգային ժողովի «Պատիվ ունեմ» խմբակցության ղեկավար Հայկ Մամիջանյանը ԵՄ-Հայաստան խորհրդարանական գործընկերության կոմիտեի նիստում հայտարարել էր. «Մենք ԵԱՏՄ անդամ ենք, մեր տնտեսությունն էապես դրանից կախված է։ Լավ է, թե վատ, այլ հարց է։ Բայց դուք արդեն ամուսնացած մարդու եք մոտեցել։ Մենք պետք է նախ ամուսնալուծվենք մեկից, նոր միայն ամուսնանաք մյուսի հետ»:
