ՄԱԿ-ի ԳԱ-ում ընդունեցին Ուկրաինայի հարցով երկրորդ բանաձևը

ՄԱԿ-ի Գլխավոր ասամբլեան փետրվարի 24-ի նիստում երկու բանաձեւ է ընդունել ռուս-ուկրաինական պատերազմի վերաբերյալ։ Այս մասին հայտնում է Meduza-ն` հղում տալով ՄԱԿ-ի հաղորդագրությանը։

Գլխավոր ասամբլեան նախ ընդունեց ԵՄ երկրների և Ուկրաինայի կողմից պատրաստված բանաձեւը։ Փաստաթուղթը, որը վերնագրված է «Ուկրաինայում համապարփակ, արդար և տեւական խաղաղության խթանում», կոչ է անում դեէսկալացիայի, ռազմական գործողությունների արագ դադարեցման և պատերազմի խաղաղ հանգուցալուծման:

 Բանաձեւին կողմ քվեարկեցին 93, դեմ՝ 18, ձեռնպահ՝ 65 երկրներ։ 

Գլխավոր ասամբլեան ավելի ուշ կողմ է քվեարկել «Խաղաղության ուղի» բանաձեւին, որը պատրաստվել է ԱՄՆ-ի կողմից։ Ինչպես գրում է ТАСС-ը, ԱՄՆ-ի բանաձևը փոփոխվել է եվրոպական երկրների կողմից, մասնավորապես, «Ռուսաստանի Դաշնության և Ուկրաինայի միջև հակամարտություն» բառերը փոխարինվել են Ռուսաստանի կողմից «լիամասշտաբ ներխուժում» բառերով։

 Բանաձեւի նախագծին կողմ է քվեարկել 92 երկիր, դեմ՝ ութը, այդ թվում՝ Ռուսաստանը, 73-ը ձեռնպահ են մնացել, այդ թվում՝ ԱՄՆ-ը։