Քաջարանի քաղաքապետի մեքենան պարեկները տարել են տուգանային հրապարակ. մանրամասներ
ՀՀ Սյունիքի մարզի Քաջարանի քաղաքապետ Մանվել Փարամազյանի 777 77 պետհամարանիշով «Տոյոտա լանդ քրուիզեր» ծառայողական մեքենան ոստիկանները տարել են տուգանային հրապարակ։ Տեղեկությունը հայտնում է «Հրապարակ» օրաթերթը։
Նշվում է, որ պարեկները կանգնեցրել են Փարամազյանին, այնուհետև առանց որևէ բացատրության առգրավել վերջինիս մեքենան, միայն նշել են, որ այն հետախուզման մեջ է։
«Պարեկային ծառայության մոտ 5 մեքենա շրջափակել է քաղաքապետին սպասարկող ամենագնացը, ստիպել, որ Փարամազյանն իջնի մեքենայից։ Մանվել Փարամազյանն այս գործողությունները որակել է որպես էժան քայլ իր նկատմամբ»,– գրում է թերթը։
Հարցին` գուցե իրավապահները մեքենան առգրավել են ինչ–որ վարույթի շրջանակում, քանի որ վերջինիս ունեցվածքը կալանքի տակ է, Փարամազյանը շեշտել է` այդ մեքենան իրեն չի պատկանում։
«Այդ մեքենան իմ սեփականությունը չէ, կոմբինատինն է, որ տրվել է ոչ թե Մանվել Փարամազյանին, այլ Քաջարանի քաղաքապետին։ Միշտ է այդպես եղել։ Արդեն 1 շաբաթ է՝ իրավապահների մոտ է, որևէ բացատրություն չեն տալիս։ Ընթացքի վրա կանգնեցրել են, թե հետախուզման մեջ է, ու տարել»,–ասել է Քաջարանի քաղաքապետը։
Պարբերականին ՀՀ ՆԳՆ–ից էլ հայտնել են, որ ստուգումներ են կատարվում, այլ մեկնաբանություններ չկան, իսկ քննչական կոմիտեից ասել են` Մանվել Փարամազյանի ծառայողական մեքենան առգրավելու կամ խուզարկելու հետ իրենք որևէ առնչություն չունեն։
Հիշեցնենք` օգոստոսի 12-ին հայտնի դարձավ, որ ՀՀ դատախազությունը Քաջարան համայնքի ղեկավար Մանվել Փարամազյանից պահանջում է բռնագանձել 6 անշարժ և 2 շարժական գույք, ինչպես նաև շուրջ 1 մլրդ դրամ։
Հիշեցնենք, որ Մանվել Փարամազյանին 2021 թվականին մեղադրանք էր առաջադրվել խարդախությանը օժանդակելու կամ այն կազմակերպելու, կաշառք ստանալու, ընտրողներին կաշառք տալու, ստանալու, ընտրությունների ժամանակ բարեգործության արգելքի խախտելու կամ ընտրող ազատ կամքի իրականացմանը խոչընդոտելու հոդվածներով։
Նրան 2021 թվականի հուլիսի 10-ին կալանավորել էին, ապա դեկտեմբերի 18-ին որոշում էր կայացվել 70 մլն դրամ գրավի դիմաց ազատ արձակել։ 2022 թվականի փետրվարի 7-ին նրան կրկին կալանավորել էին, սակայն մայիսի 2-ին դատարանը որոշում էր կայացրել 50 մլն գրավի դիմաց ազատ արձակել Փարամազյանին։
