Գերագույն Ռադան օրենք է ընդունել, որն արգելում է կանոնական Ուկրաինայի ուղղափառ եկեղեցու աշխատանքը

Գերագույն Ռադան օրենք է ընդունել, որն արգելում է Ռուսաստանի հետ կապված կրոնական կազմակերպությունների գործունեությունը, որը թույլ է տալիս արգելել կանոնական ուկրաինական ուղղափառ եկեղեցու աշխատանքը։ Այս մասին Telegram-ի իր ալիքում հայտնել է Ուկրաինայի խորհրդարանի պատգամավոր Յարոսլավ Ժելեզնյակը։

Նրա խոսքով, օրինագծին կողմ է քվեարկել 450 խորհրդարանականներից 265-ը։ Պատգամավորը նշել է, որ օրենքն ուժի մեջ կմտնի հրապարակումից 30 օր հետո։ Միաժամանակ նա ընդգծել է, որ Ուկրաինայի ուղղափառ եկեղեցու համայնքներին 9 ամիս ժամանակ կտրվի Ռուս ուղղափառ եկեղեցու հետ բոլոր կապերը խզելու համար։

Երկուշաբթի՝ օգոստոսի 19-ին, Ուկրաինայի նախագահ Վլադիմիր Զելենսկու գրասենյակի ղեկավար Անդրեյ Էրմակը հայտարարել է, որ Ուկրաինայում եկեղեցին կզրկվի «Մոսկվայի ազդեցությունից»։ Նրա խոսքով՝ Մոսկվան օգտագործում է եկեղեցին որպես գաղտնի ծառայությունների գործիք։