Պետդումա կներկայացվի օրինագիծ, որն արգելում է միգրանտներին իրենց ընտանիքներին ՌԴ բերել
Ռուսաստանի Լիբերալ-դեմոկրատական կուսակցության առաջնորդ Լեոնիդ Սլուցկին ասել է, որ մի խումբ պատգամավորներ մտադիր են Պետդումա ներկայացնել օրինագիծ, որն արգելում է Ռուսաստանի քաղաքացիություն չունեցող աշխատանքային միգրանտներին իրենց ընտանիքներին Ռուսաստան բերել։ Այս մասին հայտնում է RIA Novosti-ն։
Փաստաթղթի համաձայն՝ խոսքը ցածր որակավորում ունեցող մասնագետների մասին է, ովքեր Ռուսաստանում են մնում միայն աշխատանքային պայմանագրի կամ արտոնագրի հիման վրա և չունեն երկրում ապրելու այլ իրավական հիմքեր։ Բացառություններ են արվելու բարձր որակավորում ունեցող օտարերկրյա աշխատողների ընտանիքի անդամների համար:
Սլուցկին բացատրել է, որ նման օրինագծի մշակման պատճառը այն խնդիրներն են, որոնց բախվում են ռուսները օտարերկրացիների մեծ թվի պատճառով։
«Աշխատող միգրանտների ընտանիքները պետք է իրենց տանը սպասեն։ Երբ աշխատող օտարերկրացիների հարազատները գալիս են Ռուսաստան, նրանք ապրում են կոմպակտ անկլավներում, խոսում են իրենց լեզվով և արհամարհանքով են վերաբերվում տեղի բնակիչներին։ Հաճախ լինում են դեպքեր, երբ նման միգրանտների բնակարանները չեն վճարում բնակարանային և կոմունալ ծառայությունների համար և կուտակում են հսկայական պարտքեր, որոնց հետ ստիպված են լինում գործ ունենալ մյուս սեփականատերերը»,- ասել է նա։
