«Ես Պուտինին շատ լավ եմ ճանաչում». Թրամփի հարցազրույցն` Իլոն Մասկին
ԱՄՆ նախագահի հանրապետական թեկնածու Դոնալդ Թրամփը հայտարարել է, որ եթե հաղթի ընտրություններում, հույս ունի կրկին «լեզու գտնել» Վլադիմիր Պուտինի հետ։ Նրա կարծիքով՝ ՌԴ նախագահը լավ բանակցող է։
Ամերիկացի գործարար Իլոն Մասկի հետ հարցազրույցում Թրամփը նշել է, որ իր նախագահության օրոք լավ հարաբերություններ է պահպանել Վլադիմիր Պուտինի հետ։ «Ես Պուտինին շատ լավ եմ ճանաչում: Ես շատ լավ էի շփվում նրա հետ, նա ինձ հարգում էր»,- ասել է նա:
Դոնալդ Թրամփը կարծում է, որ Ռուսաստանի նախագահը լավ բանակցող է, մինչդեռ ԱՄՆ նախագահ Ջո Բայդենը ցածր IQ ունի։ Նրա կարծիքով՝ Բայդենը հիմարություն արեց, երբ թույլ տվեց Ուկրաինայի՝ ՆԱՏՕ-ին անդամակցելու հնարավորությունը։
Հավելենք` Իլոն Մասկը հայտնել է, որ X սոցիալական ցանցը ենթարկվել է զանգվածային կիբերհարձակման: Իլոն Մասկի խոսքով՝ փորձագետներն արդեն սկսել են վերացնել կիբերհարձակման հետեւանքները։ Նա զգուշացրել է, որ եթե խնդիրը չլուծվի, Դոնալդ Թրամփի հետ հարցազրույցը կշարունակվի ավելի քիչ ունկնդիրներով և ավելի ուշ կհրապարակվի լայն հանրության համար։
