Գազայի հատվածում Իսրայելի հարվածների հետևանքով զոհերի թիվը գերազանցել է 38 հազարը

Գազայի հատվածում Իսրայելի հարվածների հետևանքով զոհերի թիվը գերազանցել է 38 հազարը:Այս մասին հուլիսի 4-ին հայտնել Է Al Jazeera հեռուստաալիքը՝ վկայակոչելով անկլավի առողջապահության նախարարությանը։

«Հոկտեմբերի 7-ից իսրայելական ագրեսիայի hետևանքով զոհերի թիվը հասել է 38.000-ի, իսկ վիրավորներինը 87.445», - ասվում է հրապարակման մեջ:

Նախարարության տվյալներով՝ վերջին մեկ օրվա ընթացքում իսրայելցի զինվորականները չորս հարձակում են իրականացրել, որոնց հետևանքով զոհվել է 58 մարդ, ևս 179-ը վիրավորվել են և հոսպիտալացվել:

Նախօրեին հաղորդվել էր, որ Իսրայելը միջնորդների միջոցով պաղեստինյան ՀԱՄԱՍ շարժման դիտողություններն է ստացել Գազայի հատվածում հրադադարի մասին գործարքի վերաբերյալ՝ պատանդներին ազատ արձակելու դիմաց: Այնուհետև ամերիկյան CNN հեռուստաալիքը, հղում անելով իր աղբյուրին, հայտնել է, որ կողմերը մոտ են հրադադարի մասին համաձայնագրի կնքմանը: Սակայն նշվում էր, որ գործարքի իրականացման երաշխիքներ չկան. դրան պետք է համաձայնություն տա Իսրայելի վարչապետ Բենյամին Նեթանյահուն:

Մինչ այդ՝ հունիսի 14-ին, G7-ի (Մեծ յոթնյակի) երկրները կոչ էին արել Գազայի հակամարտությունը կարգավորել պաղեստինյան պետության ճանաչման միջոցով, որպեսզի պետությունները  գոյակցեն անվտանգ և ճանաչված սահմանների շրջանակներում՝ միջազգային իրավունքի հիման վրա:

Մերձավոր Արևելքում իրավիճակը սրվել էր անցյալ տարվա հոկտեմբերին։ Այն ժամանակ պաղեստինյան ՀԱՄԱՍ շարժումը Գազայի հատվածից զանգվածային հրթիռակոծության ենթարկեց Իսրայելի տարածքը, ինչպես նաև ներխուժեց երկրի հարավում գտնվող սահմանամերձ շրջաններ և պատանդներ վերցրեց: Նույն օրը Թել Ավիվը սկսել է պատասխան հարվածներ հասցնել անկլավի թիրախներին։