ԿԳՄՍ նախարարը խոսել է տեղահանված ուսանողների՝ ՀՀ-ում կրթությունը շարունակելու մասին
Լեռնային Ղարաբաղում գործել են 8 քոլեջ և ուսումնարան, 4 բուհ: Ակնկալում են, որ ուսանողների՝ այստեղ կրթությունը շարունակելու խնդիր կլինի: Այս մասին ճեպազրույցի ժամանակ ասել է ԿԳՄՍ նախարար Ժաննա Անդրեասյանը:
«Արդեն իսկ այդ կարգավորումները մշակված են, որոնք կապված են, օրինակ՝ կրեդիտների, տարբերությունների, դրանց փոխանցման և նրանց տեղափոխման գործընթացն ապահովելու՝ լոգիստիկ հարցերի հետ կապված:
Լրացուցիչ այժմ քննարկում ենք նաև ուսման վարձի հետ կապված խնդիրները, որովհետև այստեղ, կարծում եմ, նույնպես կարիքների գնահատման և լրացուցիչ առաջարկների կարիք է լինելու, որը, իհարկե, պետք է առաջին հերթին տվյալների վրա հիմնվի»,- ասել է նախարարը՝ հավելելով, որ այս հարցերին հնարավոր կլինի անդրադառնալ, երբ ԼՂ մեր հայրենակիցները տեղավորված կլինեն:
Հիշեցնենք՝ ճեպազրույցի ժամանակ ՀՀ վարչապետի մամուլի խոսնակ Նազելի Բաղդասարյանն էլ հայտնել է, որ Արցախից սեպտեմբերի 27-ի, ժամը 15։00-ի դրությամբ բռնի տեղահանվել և ՀՀ սահմանը հատել է 50 243 անձ։
