«Սա բարդ իրավիճակ է». Զելենսկին խոստովանել է, որ հակահարձակումը դանդաղ է ընթանում

Ուկրաինայի նախագահ Վլադիմիր Զելենսկին խոստովանել է, որ Ուկրաինայի ԶՈւ հակահարձակումը դանդաղ է ընթանում, սակայն զորքերը առաջ են շարժվում։ Նա մատնանշել է, որ «կարևորը հանգիստ չտալն է ռուս օկուպանտներին», գրում է ТАСС-ը: 

«Սա բարդ իրավիճակ է․ ձեզ հետ լիովին անկեղծ կլինեմ: Մենք կասեցրինք ռուսական հարձակումը և անցանք հակահարձակման, բայց դա այնքան էլ արագ չէ: Կարևոր է, որ մենք ամեն օր առաջ շարժվենք և ազատագրենք տարածքներ։ Մենք պետք է հնարավորինս ազատենք մեր տարածքը և գնանք առաջ, նույնիսկ եթե այն կես մղոնից կամ հարյուր յարդից էլ քիչ լինի, մենք պետք է դա անենք: Մենք չպետք է Պուտինին շնչելու ժամանակ տանք», - ասել է Զելենսկին CBS հեռուստաալիքի եթերում:  Նրա խոսքով` պատերազմը վերածվել է հրետանային մարտի։ 

ՌԴ ՊՆ-ն էլ հայտնել էր, որ  ուկրաինական բանակը հունիսի 4-ից  հարձակողական փորձեր է ձեռնարկում։ Սեպտեմբերի 12-ին ՌԴ նախագահ Վլադիմիր Պուտինը հայտարարել է, որ Ուկրաինայի Զինված ուժերն այս ընթացքում կորցրել են 71,5 հազար զինվորական, 543 տանկ և տարբեր դասերի գրեթե 18 հազար զրահամեքենա։