«Մենք լավ առաջընթաց ենք տեսնում հակահարձակման ժամանակ, սա շատ հուսադրող է». Բլինքեն

ԱՄՆ պետքարտուղար Էնթոնի Բլինքենը, ով այցով ժամանել է Կիև, հանդիպում է ունեցել Ուկրաինայի արտգործնախարար Դմիտրի Կուլեբայի հետ, որից հետո մամուլի ասուլիսում ասել է, որ Վաշինգտոնը լավ առաջընթաց է տեսնում Ուկրաինայի զինված ուժերի հակահարձակման մեջ։

«Ես այստեղ եմ, առաջին հերթին, որպեսզի ցույց տամ մեր շարունակական և ամուր աջակցությունն Ուկրաինային այս ագրեսիայի դեմ պայքարում», - ասել է Բլինքենը:
 

«Մենք լավ առաջընթաց ենք տեսնում հակահարձակման ժամանակ: Սա շատ հուսադրող է»,- ասել է ԱՄՆ պետքարտուղարը։
 

Խոսելով իր այցի նպատակի մասին՝ ամերիկյան արտաքին քաղաքականության վարչության ղեկավարն ասել է, որ Սպիտակ տունը «ցանկանում է համոզվել, որ Ուկրաինան ունի այն ամենը, ինչ անհրաժեշտ է ոչ միայն հակահարձակման հաջողության համար, այլ նաև պաշտպանական ներուժը ապահովելու համար»։

«Եվ մենք նաև մտադիր ենք շարունակել աշխատել մեր գործընկերների հետ, երբ նրանք կառուցում և վերակառուցում են ուժեղ տնտեսություն, ուժեղ ժողովրդավարություն: Այս ամենն անհրաժեշտ է, որպեսզի Ուկրաինան ոչ միայն գոյատևի, այլև ապագայում բարգավաճի, և Ուկրաինան ունենա ուժեղ գործընկեր՝ ի դեմս ԱՄՆ-ի»։