Թրամփն իր լուսանկարի և ձերբակալման շնորհիվ 7,1 միլիոն դոլար է հավաքել․ Politico

ԱՄՆ նախկին նախագահ Դոնալդ Թրամփը Ջորջիայում արված  իր լուսանկարը ռեկորդային դրամահավաքի է վերածել։ Այս մասին գրում է Politico-ն։

Հինգշաբթի երեկոյան  Ատլանտայում բանտարկվելուց հետո ԱՄՆ նախկին նախագահը հավաքել է 7,1 միլիոն դոլար՝ համաձայն նրա նախընտրական թիմի կողմից Politico-ին առաջին անգամ տրամադրած տվյալների: Ըստ արդյունքներին ծանոթ աղբյուրի, միայն ուրբաթ օրը Թրամփը հավաքել է 4,18 միլիոն դոլար, ինչը 24-ժամյա ժամանակահատվածը դարձրել է մինչ օրս նրա ողջ քարոզարշավի ամենաբարձր ցուցանիշը:

Քարոզարշավի համար դրամահավաքը ապահովվել է նրա առցանց խանութի միջոցով վաճառվող ապրանքների միջոցով:  Թրամփին կալանավորելուց հետո նախընտրական թիմը սկսեց վաճառել շապիկներ, պաստառներ, թափարգելի կպչուն պիտակներ և ըմպելիքների սառեցնող սարքեր, որոնց վրա պատկերված  է  Թրամփի խոժոռ դեմքը: Ապրանքներն ունեն «ԵՐԲԵՔ մի հանձնվիր» կարգախոսը, իսկ գինը տատանվում է $12-ից $34-ի սահմաններում: 

Թիմը  նաև խրախուսել է  առցանց դոնորներին ուղարկել էլ. նամակներ և տեքստային հաղորդագրություններ: Իսկ  հինգշաբթի երեկոյան Ատլանտայից Բեդմինստեր վերադառնալով՝  Թրամփը հրապարակել է իր առաջին թվիթը ավելի քան երկու տարվա ընթացքում՝ աջակիցներին ուղղորդելով դեպի իր կայք: Կայքի էջում տեղադրված է նրա լուսանկարը խնդրանք ուղղված իր աջակիցներին․ «Ձեր ներդրումն ունեցեք խաբեբա Ջո Բայդենին Սպիտակ տնից դուրս հանելու և ԱՄԵՐԻԿԱՆ փրկելու գործում՝ մեր երկրի պատմության այս մութ գլխում»:

Թրամփի նախընտրական թիմը պնդում է, որ վերջին երեք շաբաթվա ընթացքում, երբ  Թրամփին մեղադրանք է առաջադրվել հունվարի 6-ի Կապիտոլիումի անկարգություններին իր մասնակցության և 2020 թվականի ընտրություններում Ջորջիայի ձայները կեղծելու փորձի մեջ, հավաքվել է մոտ 20 միլիոն դոլար։ Սա կեսից ավելին է, քան Թրամփը հավաքել էր 2024 թվականի նախագահական մրցավազքի առաջին յոթ ամիսներին։

Այս լուսանկարը փողի վերածելու  փորձ են արել նաև մասնավոր, ոչ քաղաքական կազմակերպությունները։ 

[290594ec8cc159592531d33194b7d902.jpg]