Հռոմեական Կոլիզեյի շրջակայքը կմաքրվի առնետներից

Հռոմի Կոլիզեյի շրջակայքում առնետների ներխուժման դեմ պայքարելու համար միջոցներ են ձեռնարկվել։ Այս մասին Հռոմի քաղաքային կառավարությունը շաբաթ օրը հայտարարել է այն բանից հետո, երբ զբոսաշրջիկները սոցիալական ցանցերում հրապարակել են կրծողների լուսանկարները, որոնք շրջում են հնագույն ամֆիթատրոնի մոտ գտնվող տարածքներում:

««Հատուկ միջամտություն» է իրականացվել ուրբաթ երեկոյան և շաբաթ վաղ առավոտյան, որպեսզի  մարդիկ կարողանան ապահով տեղաշարժվել Իտալիայի ամենաշատ այցելվող զբոսաշրջային վայրերից մեկով»,- այս մասին «Adnkronos» լրատվական գործակալությանը ասել է քաղաքի աղբահանության ծառայության ղեկավար Սաբրինա Ալֆոնսին։

Ինչպես ասվում է քաղաքային կառավարության հայտարարության մեջ, գործողությունը շարունակվելու է նաև  հաջորդ շաբաթ,  մաքրվելու են  Կոլիզեյի շրջակայքի կանաչ տարածքները, կեղտաջրերը, որտեղ առնետները սովորական երևույթ են և թակարդներ են տեղադրվելու։ 

Հայտարարության մեջ ասվում է, որ քաղաքում կա մոտ 7 միլիոն առնետ, կամ 2,5 առնետ՝ յուրաքանչյուր բնակչին։ Ալֆոնսին ասել է, որ այս ամառ դեպի Հավերժական քաղաք զբոսաշրջիկների աճը, զուգորդված ծայրահեղ շոգի հետ, հանգեցրել է աղբի ավելացմանը, ինչը նպաստել է կրծողների բազմացմանը:

Հռոմը տարիներ շարունակ պայքարում է աղբի ճգնաժամի դեմ, երբ աղբակույտերը հաճախ թափված են փողոցներում՝ լցված աղբամանների կողքին:

2000 տարի առաջ կառուցված Կոլիզեյը Հռոմեական կայսրության ամենամեծ ամֆիթատրոնն էր և օգտագործվում էր գլադիատորների մարտերի, մահապատիժների և կենդանիների որսի համար։