ՏԵՍԱՆՅՈՒԹ․ «Հիլարի» արևադարձային փոթորկին զուգահեռ երկրաշարժ է գրանցվել․ ԱՄՆ

ԱՄՆ Կալիֆոռնիա նահանգի ափեր հասած «Հիլարի» արևադարձային փոթորիկը Լոս Անջելեսի արևելքում և արևմուտքում հեղեղումների պատճառ է դարձել։ Մինչ այդ փոթորիկն անցել էր Մեքսիկայով՝ այնտեղ 1 մարդու կյանք խլելով, հեղեղելով ճանապարհները և փողոցները։ Այս մասին հաղորդում է Reuters-ը։

Կալիֆոռնիայի նահանգապետ Գևին Նյուսոմը Հարավային Կալիֆոռնիայում արտակարգ դրության ռեժիմ է հայտարարել։ Ըստ կանխատեսումների՝ լեռնային և անապատային հատվածներում սպասվում են 12-25 սմ տեղումներ՝ գրեթե այնքան, որքան անապատային շրջաններում լինում է 1 տարվա ընթացքում։

Փոթորիկը ծառեր է տապալել, օդ է բարձրացրել քարեր։ Հետաձգվել են սպորտային տարբեր միջոցառումներ, հարյուրավոր թռիչքներ չեղարկվել են։ Կալիֆորնիայի երկու շրջաններում օգոստոսի 21-ին չեղարկվել են դասերը։

«Հիլարի» փոթորկին զուգահեռ՝ Լոս Անջելեսից հյուսիս նաև 5,1 մագնիտուդ ուժգնությամբ երկրաշարժ է գրանցվել։ ԱՄՆ-ի ցունամիների նախազգուշացման կենտրոնում հայտնել են, որ երկրաշարժից հետո ցունամիի վտանգ չի հայտարարվել։ Երկրաշարժից ավերածությունների կամ տուժածների մասին տեղեկություններ չեն հաղորդվել։