Ռազմական

Հայտնի ուկրաինացի կարատեիստը կասկածվում է «Կրասնոդար» սուզանավի նախկին հրամանատարի սպանության մեջ

11.07.2023 17:02

Ուկրաինայի շոտոկան կարատե-դո ֆեդերացիայի նախկին նախագահ Սերխի Դենիսենկոն ձերբակալվել է ՌԴ ՊՆ մոբիլիզացիոն աշխատանքների գծով քաղաքային վարչության պետի տեղակալ Ստանիսլավ Ռժիցկիի սպանության կասկածանքով, հայտնում է SHOT թելեգրամյան ալիքը։

Ալիքի տվյալներով՝ Դենիսենկոն ծնվել է Ուկրաինայի Սումիի մարզում։ Նա ունի սև գոտի, յոթերորդ դան (իննից): Ուկրաինայի կարատե-դո ֆեդերացիայի նախագահը Ռուսաստանում, հավանաբար, մարզչական աշխատանքով է զբաղվել։ Այսօր նրան բերման են ենթարկել Տուապսեում վարձակալած բնակարանում, որտեղ քննիչները հայտնաբերել են խլացուցիչով ատրճանակ, որից նա, ենթադրաբար, կրակել է Ռժիցկիի վրա։

Սանկտ Պետերբուրգի շոտոկան կարատե-դո ֆեդերացիայի նախագահ Կոնստանտին Պլենկովն ասել է, որ չի հավատում Դենիսենկոյի մասնակցությանը սպանությանը։ Նրա խոսքով՝ ուկրաինացին չափազանց ազնիվ ու պարկեշտ է նման բան անելու համար։ Ճիշտ է, նա նշել է, որ իրենք վերջին անգամ կապ են ունեցել հատուկ գործողության մեկնարկից առաջ։