Ռուսաստանի կեսն աջակցել է «Վագների»-ի ապստամբությանը. Զելենսկի

Ուկրաինայի նախագահ Վլադիմիր Զելենսկին CNN-ին տված բացառիկ հարցազրույցում ասել է, որ Ռուսաստանի բնակչության կեսը սատարել է Եվգենի Պրիգոժինին  ապստամբության ժամանակ, և որ այժմ Վլադիմիր Պուտինն ամեն ինչ կանի երկրում իր իշխանությունն ամրապնդելու համար։

Ըստ ուկրաինական հետախուզության, Զելենսկին ասել է, որ Կրեմլը վերլուծել է իրավիճակը և տեսել, որ «Վագների» ղեկավարին աջակցում է ռուսների զգալի մասը, ովքեր սկսել են լրջորեն կասկածել իշխանության համարժեքությանը։
 

Նույն հարցազրույցում Ուկրաինայի առաջնորդն անդրադարձել է Զապորոժյեի ատոմակայանում տիրող իրավիճակին, Ռուսաստանի հարավ-արևմտյան շրջանների գնդակոծմանը։

Նա կարծում է, որ հանուն պատերազմի ընթացքում շրջադարձային պահի և իր նպատակներին հասնելու համար Մոսկվան ունակ է կատարելապես անխոհեմ գործողությունների, այդ թվում՝ սադրանքի ԶԱԷԿ-ում։ Նրա խոսքով՝ Ուկրաինայի պաշտպանության նախարարությունն այս դեպքում ձեռնարկել է անհրաժեշտ միջոցներ։ Նա նաև հիշեցրել է, որ ռուսական կողմը ամեն կերպ փորձում է հասկացնել, որ դիվերսիայի սպառնալիքը գալիս է Կիևից։