ՏԵՍԱՆՅՈՒԹ․ Առնվազն 10 պաղեստինցի է զոհվել Հորդանանի արևմտյան ափին իսրայելական գործողության արդյունքում

Երկուշաբթի Ջենին քաղաքում իսրայելական հակաահաբեկչական գործողության ժամանակ Հորդանան գետի արևմտյան ափին լայնածավալ բախումներ են տեղի ունեցել պաղեստինցիների և իսրայելական անվտանգության ուժերի միջև, հայտնում են իսրայելական լրատվամիջոցները։ 

The Jerusalem Post-ի փոխանցմամբ՝ երկուշաբթի գիշերը սկսված գործողության ընթացքում առնվազն 10 պաղեստինցի է զոհվել, ևս առնվազն 20-ը ձերբակալվել են։ Այժմ իսրայելական բանակը շարունակում է գործողությունը ոչ միայն Ջենինում, այև Հորդանան գետի արևմտյան ափի այլ բնակավայրերում։ 

Գործողության ընթացքում իսրայելցի զինվորականները, ի թիվս այլ բաների, հայտնաբերել են պայթուցիկ սարքերի արտադրության լաբորատորիա և պահեստ՝ հարյուրավոր սարքերով, որոնք պատրաստ են օգտագործման, ինչպես նաև երկու պահեստ՝ ինքնաշեն ռումբերով։ 

Բացի այդ, բախումներ են տեղի ունեցել Արևմտյան ափի հրեական բնակավայրերի բնակիչների և պաղեստինցիների միջև, նրանք քարեր են նետել միմյանց վրա։ 

Պաղեստինյան «Իսլամական ջիհադ» զինյալ շարժումն Իսրայելի գործողություններն անվանել է «կոտորած» և խոստացել պատասխանել դրան։ 

Մինչդեռ ՀԱՄԱՍ շարժումը, որը վերահսկում է Գազայի հատվածը, կոչ է արել պաղեստինցի երիտասարդներին միանալ իսրայելցիների հետ բախումների մեջ ներգրավվածներին։