Նեթանյահուն հայտարարել է Ջենինում հակաահաբեկչական գործողության ավարտի մասին

Իսրայելի վարչապետ Բենիամին Նեթանյահուն երեքշաբթի այցելել է Ջենինի մոտ գտնվող Սալեմ անցակետը և հայտարարել քաղաքում հակաահաբեկչական գործողության ավարտի մասին՝ զգուշացնելով, որ դա մեկանգամյա գործողություն չէ։ Այս մասին հայտնում է РИА Новости-ն։

«Ես շնորհավորում եմ մեր խիզախ մարտիկներին, ովքեր Ջենինում ոչնչացրին ահաբեկիչների մեծ թվով թիրախներ և այդպիսով կանխեցին բազմաթիվ հարձակումներ: Այժմ մենք ավարտում ենք առաքելությունը, և կարող եմ ասել, որ մեր լայնածավալ գործողությունը Ջենինում մեկանգամյա չէ։ Այն կշարունակվի այնքան ժամանակ, քանի դեռ ահաբեկչությունը արմատախիլ անելու անհրաժեշտություն կա, մենք թույլ չենք տա, որ Ջենինը նորից ապաստան դառնա ահաբեկիչների համար, և մենք կկործանենք և կճնշենք ահաբեկչությունը, որտեղ տեսնենք»,- ասել է Նեթանյահուն իր գրասենյակի տարածած հաղորդագրության մեջ։ 

Իսրայելի վարչապետի հետ միասին Սալեմի անցակետում ներկա է գտնվել Իսրայելի պաշտպանության նախարար Յոավ Գալանտը։ Իսրայելի պաշտպանության բանակի հրամանատարները նրանց ներկայացրել են Ջենինում տիրող իրավիճակը և գործողության ընթացքը։ 

Նեթանյահուն մեկնաբանել է նաև Թել Ավիվում այսօր տեղի ունեցած ահաբեկչությունը՝ նշելով հարձակվողին վնասազերծած քաղաքացու խիզախությունը։