Կրեմլը փորձում է վերահսկողության տակ առնել «Վագներ»-ի խումբը․ WSJ

The Wall Street Journal-ը լայնածավալ նյութեր է հրապարակել այն մասին, թե ինչպես կարող է «Վագներ»-ի խմբի ղեկավար Եվգենի Պրիգոժինի ապստամբությունը ազդել Աֆրիկայում և Մերձավոր Արևելքում իրավիճակի վրա, որտեղ վերջին տարիներին ներկա են եղել ռուս վարձկանները, գրում է BBC-ի ռուսական ծառայությունը։

Ռուսական իշխանությունները, որոնք տարիներ շարունակ հերքել են վարձկան զինյալների խմբավորման հետ կապերը, շաբաթ օրը Եվգենի Պրիգոժինի շարասյուների կանգ առնելուց մի քանի ժամ անց կազմակերպեցին դիվանագիտական ​​ակտիվություն՝ վստահեցնելու Աֆրիկայում և Մերձավոր Արևելքում գտնվող գործընկերներին, որ խմբավորման գործողություններն այնտեղ կշարունակվեն, բայց արդեն այլ ղեկավարությամբ, գրում է WSJ-ն։

Ըստ լրատվամիջոցի՝ ՌԴ ԱԳՆ ներկայացուցիչները շտապ թռիչք են կատարել Սիրիա, Կենտրոնական Աֆրիկայի Հանրապետություն և Մալի։

«Ռուսաստանը կարծես փորձում է յուրացնել Պրիգոժինի վարձկանների հսկայական ցանցը, սակայն դեռ պարզ չէ, թե որքանով է դա հնարավոր և որքան արագ դա կարող է տեղի ունենալ», - նշում է հրատարակությունը։ 

««Վագներ»-ի խումբն օգնեց Ռուսաստանին ամրապնդել իր ազդեցությունը, և կառավարությունը չի ցանկանում հրաժարվել դրանից», - մեջբերում է WSJ-ը՝ Արևմտյան Աֆրիկայում ԱՄՆ նախկին հատուկ բանագնաց Ջոն Փիթեր Ֆեմի խոսքերը: 

WSJ-ը նաև մեջբերում է որոշ միջազգային փորձագետների, ովքեր ասում են, որ ԱՄՆ-ն կարող է օգտվել խառնաշփոթից և փորձել գրավել ազդեցությունն այն երկրներում, որտեղ գործում էր «Վագներ»-ի խումբը։