Պրիգոժինը ստիպված էր գործել ավելի շուտ, քան ծրագրված էր․ WSJ-ն մանրամասներ է հայտնել

Ռուսաստանում տեղի ունեցած զինված ապստամբության ժամանակ «Վագներ» խմբավորման ղեկավար Եվգենի Պրիգոժինը մտադրվել էր գերի վերցնել ՌԴ պաշտպանության նախարար Սերգեյ Շոյգուին և Գլխավոր շտաբի պետ Վալերի Գերասիմովին։ Այս մասին հայտնում է Wall Street Journal-ի ամերիկյան բիզնես հրատարակությունը։

Հրատարակությունը նշել է, որ ՌԴ անվտանգության դաշնային ծառայությունը Պրիգոժինի ծրագրերի մասին իմացել է դրանց իրագործումից 2 օր առաջ, և որ դա ստիպել է նրան վերջին պահին փոխել իր ծրագրերն ու սկսել երթով շարժվել դեպի Մոսկվա։

Արևմտյան հետախուզության աշխատակիցները Պրիգոժինի պլանների մասին նախապես իմացել են արբանյակային լուսանկարներից և էլեկտրոնային հաղորդագրությունների որսումներից։ Ըստ WSJ-ի աղբյուրների՝ Պրիգոժինի պլանը բավականին իրագործելի էր և ձախողվեց միայն դրա մասին տեղեկատվության արտահոսքից հետո, ինչը «Վագների» ղեկավարին ստիպեց իմպրովիզներ անել, քանի որ իմանալով այս արտահոսքի մասին՝ Պրիգոժինը ստիպված էր գործել ավելի շուտ, քան նախատեսված էր:

«Վագների» զորքերի կողմից Դոնի Ռոստովը գրավելու դյուրինությունը, ըստ հետախուզության պաշտոնյաների, վկայում է այն մասին, որ ռուսական կանոնավոր զորքերի առանձին հրամանատարներ կարող էին ներգրավված լինել դավադրության մեջ: Նախկինում նման տեղեկություն արդեն հայտնել էր NYT-ը։