ՏԵՍԱՆՅՈՒԹ. «Պետք է հույս հայտնել, որ մահապարտների ցանկում դասալիքների հատուկ ստորաբաժանում կլինի». Փաշինյան
ՀՀ վարչապետ Նիկոլ Փաշինյանն անդրադարձել է «Հայաստան» խմբակցության պատգամավոր Աղվան Վարդանյանի հայտարարությանը, թե 100 մահապարտ է պետք, որոնք կյանքը կզոհեն և մինչև վերջ կգնան։
ԱԺ-կառավարություն հարցուպատասխանի ժամանակ Փաշինյանն ասաց, թե այդ հարցով պետք է գլխավոր դատախազությունը զբաղվի. «Ինչ վերաբերում է ձեր նշած մահապարտներին, պետք է հույս հայտնել, որ այդ մահապարտների ցանկում 44-օրյա պատերազմի դասալիքների հատուկ ստորաբաժանում կլինի՝ այդ խնդիրը լուծելու համար։ Կարծում եմ՝ «ադապտացիայի» ճիշտ մեթոդ են գտել»,- ասաց նա։
Փաշինյանը նշեց, թե իրենց քաղաքական ուղեգիծն է՝ օրենքի գերակայություն և օրենքի դիկտատուրա. «Դա մեր նախընտրական թեզն է։ Ընդ որում, ասեմ հետևյալը․ ովքեր օրենքի գիծը կհատեն, օրենքով նախատեսված ուղիներով կգտնեն իրենց տեղը այս կյանքում»։
Ըստ Փաշինյանի՝ ԼՂ հարցի բանակցային գործընթացի վերաբերյալ առաջիկայում մանրամասն խոսակցություն կլինի, այդ թվում՝ քննիչ հանձնաժողովում. «Եթե մահապարտների ջոկատ կազմող էին, իրենք էին ընդունել սկզբունքները, որոնցով ԼՂ-ն ճանաչել են Ադրբեջանի մաս։ Ուրիշ բան՝ ճանաչել են դրսում, ներսում եկել, մահապարտի ջոկատներ են կազմել։ Իսկ նշված մահապարտների ջոկատները՝ նշված մարդու նման նախարարական կաբինետներում նստած, զբաղված են եղել բոլորովին այլ խնդիրների լուծմամբ»։
