Մոլդովայի ընդդիմադիր կուսակցության փոխնախագահին կալանավորել են Քիշնևի օդանավակայանում

Մոլդովայի «Շոր» ընդդիմադիր կուսակցության փոխնախագահ Մարինա Տաուբերը կալանավորվել է Քիշնեւի օդանավակայանում, նա փորձում էր հեռանալ երկրից, երկուշաբթի տեղեկացրել է Մոլդովայի Հակակոռուպցիոն դատախազության մամուլի ծառայությունը։

Փետրվարի սկզբին վերականգնվել էր Տաուբերի տեղաշարժվելու իրավունքը, վերականգնվել էր նաեւ ցանկացած անձի հետ շփվելու նրա իրավունքը, դատարանը որոշում էր կայացրել քաղաքական գործչին վերադարձնել նաեւ օտարերկրյա անձնագիրը։

«Այսօր առավոտյան Մարինա Տաուբերը կալանավորվել է Քիշնեւի միջազգային օդանավակայանում, Ստամբուլով (Թուրքիա) Թել Ավիվ (Իսրայել) ուղեւորվելու ճանապարհին։ Կալանավորումն իրականացվել է Հակակոռուպցիոն դատախազության դատախազի այսօր կայացրած որոշման հիման վրա. ըստ դրա՝ Տաուբերը խախտել է իր հանդեպ կիրառվող խափանման միջոցներով նախատեսված պայմանները»,- նշվել է դատախազության կայքում հրապարակված հայտարարությունում։