Կովկասյան տարածաշրջանը «զգայուն ժամանակաշրջան է ապրում»․ Իրանի բարձրաստիճան պաշտոնյա
Կովկասյան տարածաշրջանում լարվածությունն ու հակամարտությունը ոչ մի երկրի ձեռնտու չէ, միաժամանակ Իրանը դեմ է այդ տարածաշրջանի աշխարհագրական ցանկացած փոփոխությանը։ Այս մասին կիրակի Թեհրանում գտնվող Հայաստանի Անվտանգության խորհրդի քարտուղար Արմեն Գրիգորյանի հետ հանդիպման ժամանակ ասել է Իրանի Ազգային անվտանգության գերագույն խորհրդի քարտուղար Ալի Շամխանին, գրում է իրանական PressTV-ն։
«Հարավային Կովկասի տարածաշրջանում ցանկացած աշխարհագրական փոփոխություն լարվածության ստեղծման միջոց է, որը կխաղա հօգուտ տարածաշրջանային անվտանգության և կայունության թշնամիների»,- ասել է Շամխանին։
Իրանի անվտանգության բարձրաստիճան պաշտոնյան ավելացրել է, որ շարունակական երկխոսությունն ու փոխգործակցությունը պետք է փոխարինեն տարածաշրջանային մարտահրավերներին վերջ տալու ցանկացած «կոշտ մոտեցմանը»:
Շամխանին հայտարարել է, որ Կովկասյան տարածաշրջանը «զգայուն ժամանակաշրջան է ապրում»՝ հույս հայտնելով, որ Ադրբեջանն ու Հայաստանը «կկարողանան հաղթահարել առկա լարվածությունը զսպվածության և խոհեմության միջոցով»:
Ավելի վաղ ՀՀ Անվտանգության խորհրդի մամուլի ծառայությունը հայտնել էր, որ Գրիգորյանն ու Շամխանին հանդիպման ընթացքում քննարկել են տարածաշրջանում անվտանգության իրավիճակը, ինչպես նաև հայ-իրանական երկկողմ հարաբերություններն ու դրանց զարգացման հեռանկարները:
