ՌԴ ԱԳ նախարար Սերգեյ Լավրովը Մոսկվայում քառակողմ հանդիպման մեկնարկից առաջ դիմել է Սիրիայի, Թուրքիայի և Իրանի ներկայացուցիչներին, գրում է Вести-ն։

Ապրիլի 3-4-ը Մոսկվայում տեղի են ունեցել խորհրդակցություններ Ռուսաստանի, Իրանի, Սիրիայի և Թուրքիայի միջև՝ փոխնախարարների մակարդակով։ Հանդիպումների նպատակը Անկարայի և Դամասկոսի միջև հարաբերությունների կարգավորումն է։

ՌԴ-ի գլխավոր դիվանագետի խոսքով՝ Ռուսաստան-Իրան-Սիրիա-Թուրքիա քառակողմ խորհրդակցությունների բոլոր մասնակիցները պետք է ճկունություն ցուցաբերեն, քանի որ թուրք-սիրիական հարաբերությունների կարգավորման գործընթացը երկար ժամանակ կպահանջի։ Դիմումի տեքստը երեքշաբթի հրապարակվել է ՌԴ ԱԳՆ կայքում։

«Ես կցանկանայի առանձին դիմել թուրք և սիրիացի բանակցողներին: Մենք ակնկալում ենք, որ դուք կցուցաբերեք առավելագույն ճկունություն և կառուցողականություն: Հավանաբար, ավելի լավ է առճակատման հռետորաբանությունը և անցյալի դժգոհությունների հիշողությունը թողնել բանակցությունների սենյակից դուրս», - ասել է Լավրովը:

Սերգեյ Լավրովը կոչ է արել քննարկումներ սկսել՝ հիմնված Սիրիայի և Թուրքիայի ինքնիշխանության, միասնության և տարածքային ամբողջականության փոխադարձ հարգանքի հստակ և հասկանալի սկզբունքի վրա՝ առաջնորդվելով կուտակված խնդիրները արագ հաղթահարելու և բարիդրացիությունը վերականգնելու ցանկությամբ։

«Կան պատվիրակությունների կողմից ներկայացված տեքստեր, ես վստահ եմ, որ դրանց հիման վրա հնարավոր է հասնել կոլեկտիվ դիրքորոշման,- նշել է ռուս նախարարը,- գլխավորը շահերի հավասարակշռություն ձևավորելու և նախապայմաններից խուսափելու համար ընդհանուր լեզու փնտրելն է...»:

Ռուսաստանն արդեն առաջարկել է խորհրդակցությունների բոլոր մասնակիցներին արտգործնախարարների մակարդակով հանդիպման ժամկետը, հայտնում է Интерфакс-ը։

«Ես անհամբեր կսպասեմ ձեր համաձայնությանը Մոսկվայում արտգործնախարարների մակարդակով իմ ընկերների և գործընկերների՝ Հոսեյն Ամիր Աբդոլլահյանի, Մևլութ Չավուշօղլուի, Ֆեյսալ Միկդադի հետ հանդիպման ժամկետի վերաբերյալ: Մենք առաջարկել ենք որոշ ժամկետներ, որոնք կարող են ընդհանուր առմամբ ընդունելի դառնալ ձեր բանակցային փուլից հետո»,- ասել է Լավրովը։