Նյու Յորքի դատարանը մերժել է Թրամփի գործով դատական լսումներն ուղիղ հեռարձակել
Նյու Յորքի Գերագույն դատարանի դատավորի ժամանակավոր պաշտոնակատար Խուան Մերկանը մերժել է մի շարք լրատվամիջոցների՝ ԱՄՆ նախկին նախագահ Դոնալդ Թրամփի գործով դատական լսումները ուղիղ հեռարձակելու հնարավորության խնդրանքը, հայտնում է CNN-ը։
Հեռուստաալիքի տվյալներով՝ Մերչանը մերժել է մի քանի լրատվամիջոցների, այդ թվում՝ CNN-ի խնդրանքը՝ «պատմական գործընթացը» հեռարձակելու թույլտվություն ստանալու համար։
Այնուամենայնիվ, դատավորը հինգ լուսանկարչի թույլ է տվել դատավարության սկզբում լուսանկարել «մինչև դատարանի աշխատակիցների կողմից նրանց կարգադրվել է տեղ բացել երդվյալ ատենակալների համար»:
Մերչանն իր որոշումը կայացրել է այն բանից հետո, երբ Թրամփի փաստաբանական թիմը դեմ է արտահայտվել դատարանի դահլիճում տեսախցիկների տեղադրմանը, քանի որ դա «կրկեսային» մթնոլորտ կստեղծի։
Ավելի վաղ Նյու Յորք ժամանած Թրամփը հայտնել էր, որ երեքշաբթի դատարանում իրեն մեղադրանք է առաջադրվելու 33 կետով։
Փաստաբան Ալինա Հաբբան, ով ներկայացնում է ԱՄՆ նախկին նախագահ Դոնալդ Թրամփին մի քանի քաղաքացիական գործերով, ասել է, որ չի ակնկալում նրա նկատմամբ արդար դատավարություն։
«Ոչ, ոչ: Ես կարծում եմ, որ դա շատ դժվար է: Ես կցանկանայի հավատալ այս նահանգին, բայց ես պաշտպանում եմ նրան (Դոնալդ Թրամփին) արդեն մի քանի տարի և մի քանի տարի Նյու Յորքի դատարանում եմ, և ես կարող եմ ձեզ ասել, որ դա նույնը չէ, ինչ ուրիշի շահերը ներկայացնելը»,- ասել է Հաբբան՝ Fox News-ին տված հարցազրույցում պատասխանելով հարակից հարցին։
Նա ասել է, որ որոշ ժամանակ է անցկացրել իր հաճախորդի հետ, ով արդեն ժամանել էր Նյու Յորք, և նշել, որ Թրամփը «լավ տրամադրություն ունի», երեքշաբթի պատրաստ է «գնալ և անել այն, ինչ պետք է անի»:
«Բացի ցանկացած անակնկալից, կարծում եմ, որ ամեն ինչ պետք է հարթ ընթանա, մենք փորձում ենք համակարգել մեր գործողությունները և համագործակցել բոլորի հետ, որպեսզի խնդիրներ չլինեն»,- հավելել է փաստաբանը։
Երբ ԱՄՆ 45-րդ նախագահը ժամանեց Նյու Յորքի Թրամփ Թաուեր, նրա կողմնակիցների մի փոքր խումբ վանկարկել է և ծածանել պաստառներ՝ «Թրամփը հաղթում է» և «Ձերբակալեք Բայդենին», հայտնում է CNN-ը:
Անցյալ շաբաթ ամերիկյան լրատվամիջոցները հայտնել էին, որ Նյու Յորքի երդվյալ ատենակալները քվեարկել են Սթորմի Դենիելսի գործով Թրամփին մեղադրելու օգտին:
