Ինչ է քննարկվել ՔՊ նիստին․ ներկա է եղել Փաշինյանը
«Քաղաքացիական պայմանագիր» կուսակցության վարչության այսօրվա նիստում ամփոփվել են Սիսիան և Անի համայնքներում կայացած ՏԻՄ ընտրությունների արդյունքները։ Այս մասին նշվում է ՔՊ–ի ֆեյսբուքյան էջում։
«Հաստատվել է «Քաղաքացիական պայմանագիր» կուսակցության մարմինների ընտրության կարգը։ Քննարկվել են կուսակցությանն անդամագրվելու դիմումների քննարկման, նախաձեռնող խմբի նիստերի անցկացման վերաբերյալ և այլ ընթացիկ հարցեր»,– նշվում է հաղորդագրության մեջ։
Նշվում է, որ նիստը վարել է վարչության նախագահ, ՀՀ վարչապետ Նիկոլ Փաշինյանը:
ԶԼՄ–ներն ավելի վաղ գրել էին, որ նիստում քննարկվելու է ԱԺ նախագահ Ալեն Սիմոնյանի հետ կապված միջադեպը:
Այս առնչությամբ ԱԺ նախագահի խոսնակ Ծովինար Խաչատրյանը հայտնել է, որ «Քաղաքացիական պայմանագիր» կուսակցության վարչության նիստում քննարկվել են բացառապես պետականաշինությանն առնչվող հարցեր։
«Ազատության» հարցին, թե արդյոք քննարկվել է Ալեն Սիմոնյանի արարքը, երբ քաղաքացին ահազանգել էր, թե թքել է իր դեմքին, երբ Սիմոնյանին դավաճան է ասել, կամ դրան հաջորդած զարգացումները, խոսնակը բացասական է արձագանքել։
