Դանիայի դեսպանը կանչվել է Թուրքիայի ԱԳՆ՝ Ղուրանի և Թուրքիայի դրոշի դեմ բողոքի ակցիաների պատճառով
Թուրքիայի ԱԳՆ է կանչվել Անկարայում Դանիայի դեսպանը՝ կապված Ղուրանի և Թուրքիայի դրոշի վրա «հարձակման» հետ։
«Մեր նախարարություն կանչված Դանիայի դեսպանը տեղեկացվել է, որ մենք խստորեն դատապարտում և բողոքում ենք այս նողկալի հարձակումը»,- նշվում է գերատեսչության տարածած հաղորդագրության մեջ։
Նախարարությունը հորդորել է Դանիայի իշխանություններին անհրաժեշտ գործողություններ ձեռնարկել «այս հանցագործության հեղինակների դեմ և միջոցներ ձեռնարկել՝ կանխելու նման սադրանքների կրկնությունը»։
Մարտի 25-ին հայտնի դարձավ, որ Թուրքիայի ԱԳՆ-ն դատապարտել է Ղուրանի պղծումը, որը տեղի է ունեցել Դանիայում։
Նշվում է, որ սուրբ Ռամադան ամսին անցկացված այս ակցիան ցույց է տվել Եվրոպայում օրեցօր աճող «իսլամաֆոբիայի, խտրականության և այլատյացության» մակարդակը։
