ՌԴ արտաքին քաղաքականության նոր հայեցակարգի տրամաբանությունն արտացոլում է միջազգային գործերում հեղափոխական տեղաշարժերը։ Այս մասին տեսակոնֆերանսի ռեժիմով անցկացվող ՌԴ Անվտանգության խորհրդի մշտական անդամների հետ խորհրդակցության ժամանակ հայտարարել է ՌԴ ԱԳ նախարար Սերգեյ Լավրովը։

«Փաստաթղթի տրամաբանությունն արտացոլվում է փոփոխվող աշխարհաքաղաքական իրողությունները։ Ըստ էության` դրանք արտաքին ուրվագծում հեղափոխական տեղաշարժերն են, որոնք տեսանելիորեն արագացել են հատուկ ռազմական գործողության մեկնարկի հետ կապված»,– ասել է Լավրովը։

Արտգործնախարարի խոսքով` ՌԴ արտաքին քաղաքականության նոր հայեցակարգում խոսվում է համաշխարհային տնտեսության լրջագույն կառուցվածքային փոփոխությունների մասին։

«Տրվում է միջազգային զարգացման հիմնական երկարաժամկետ միտումների բնութագիրը` ներառյալ տնտեսական գլոբալիզացիայի ճգնաժամը, որը մինչև վերջերս իրականացվում էր ամերիկյան կանոններով։ Գործոններից մեկն այն է, որ համաշխարհային տնտեսությունը լրջագույն կերպով վերակազմավորվում է և անցնում նոր տեխնոլոգիական հենքի»,- ասել է նա։

Ռուսաստանի ԱԳՆ ղեկավարն ընդգծել է, որ ՌԴ-ի արտաքին քաղաքականության նոր հայեցակարգում ԱՄՆ-ն ուղղակիորեն անվանվել է հակառուսական գծի գլխավոր նախաձեռնողը:

Լավրովը նշել է նաև, որ նոր հայեցակարգով արձանագրվում է վերջին տասնամյակում միջազգային լարվածության աննախադեպ մակարդակ:

ԱԳ նախարարը հայտարարել է, որ արտաքին քաղաքականության նոր հայեցակարգում նախատեսված է պատասխան սիմետրիկ կամ ասիմետրիկ միջոցների ներդրման հնարավորություն՝ Ռուսաստանի դեմ ոչ բարեկամական գործողությունների:

«Հայեցակարգի դրույթները ենթադրում են, որ ոչ բարեկամական պետությունների հակառուսական քայլերը հետևողականորեն և անհրաժեշտության դեպքում խստորեն կկասեցվեն»,- ասել է նախարարը:

Բացի այդ, Ռուսաստանի արտաքին քաղաքականության նոր հայեցակարգում ներկայացվում է զինված ուժերի օգտագործման թեզը՝ Ռուսաստանի և նրա դաշնակիցների վրա զինված հարձակումը հետ մղելու կամ կանխելու համար։

Նշենք, որ մարտի 31-ին ՌԴ նախագահ Վլադիմիր Պուտինը հրամանագիր է ստորագրել արտաքին քաղաքականության նոր հայեցակարգի հաստատման մասին։