Թայվանի վարչակազմի ղեկավարը մեկնել է ԱՄՆ․ WSJ
Թայվանի վարչակազմի ղեկավար Ցայ Ինգ Վենը չորեքշաբթի ժամանել է Նյու Յորք։ Այս մասին հայտնում է The Wall Street Journal-ը։
Հրատարակության տվյալներով՝ Ցայ Ինգ Վենը «ավելի քան երեք տարվա ընթացքում առաջին անգամ է ժամանել ԱՄՆ»։ Պարբերականն ընդգծում է, որ այցը ոչ պաշտոնական է, Ցայ Ինգ Վենը տարանցիկ կերպով ԱՄՆ-ում է՝ Կենտրոնական Ամերիկա մեկնելու ճանապարհին։ Թայվանի վարչակազմի ղեկավարը Նյու Յորքում կլինի մինչև ուրբաթ, հայտնում է The Wall Street Journal-ը:
Ավելի վաղ Չինաստանի արտգործնախարարության խոսնակ Մաո Նինգը հայտարարել էր, որ Պեկինը ուշադիր հետևում է իրադարձություններին՝ կապված մարտի 29-ին ԱՄՆ տարածքով Բելիզ և Գվատեմալա անցած Ցայ Ինգ Վենի այցի հետ և վճռականորեն կպաշտպանի պետական ինքնիշխանությունն ու տարածքային ամբողջականությունը։ Ինչպես նշել է դիվանագետը, Չինաստանը դեմ է ԱՄՆ-ի և Թայվանի միջև պաշտոնական կապերի ցանկացած ձևի, ինչպես նաև Վաշինգտոնի և Թայբեյի միջև ցանկացած շփումների, որոնք խախտում են «մեկ Չինաստան» սկզբունքը։
Չինաստանը բազմիցս խիստ զգուշացումներ է արել ամերիկյան կողմին Ցայ Ինգ Վենի՝ ԱՄՆ-ով տարանցման հարցի վերաբերյալ, հավելել է ԱԳՆ ներկայացուցիչը։ Ավելի վաղ հաղորդվել էր Ցայ Ինգ Վենի և Ներկայացուցիչների պալատի նախագահ Քևին Մաքքարթիի հանդիպման պլանների մասին։
