Թուրքիայի խորհրդարանը վաղը կքվեարկի Ֆինլանդիայի՝ ՆԱՏՕ-ին անդամակցելու հայտի շուրջ
Թուրքիայի խորհրդարանը հինգշաբթի կքվեարկի Ֆինլանդիայի՝ ՆԱՏՕ-ին անդամակցելու հայտի շուրջ, հաղորդում է Bloomberg-ը։
Այլ մանրամասներ չեն հաղորդվում։
Այս շաբաթվա սկզբին Հունգարիայի խորհրդարանը վավերացրեց Ֆինլանդիայի անդամակցությունը ՆԱՏՕ-ին: Դրանից հետո Թուրքիան մնացել է դաշինքի միակ անդամը, որի խորհրդարանը դեռ չի հաստատել ֆինների դիմումը։
ՆԱՏՕ-ի անդամ երկրները 2022 թվականի հուլիսի 5-ին ստորագրել են Ֆինլանդիայի և Շվեդիայի՝ Հյուսիսատլանտյան խորհրդին միանալու արձանագրությունները։ Այս երկրները կմիանան ՆԱՏՕ-ին, երբ ՆԱՏՕ-ի անդամ բոլոր երկրները վավերացնեն անդամակցության արձանագրությունները:
Թուրքիան արգելափակեց անդամակցության գործընթացը՝ երկու հյուսիսային երկրներից պահանջելով քրդական կազմակերպություններին ահաբեկիչներ ճանաչել և ահաբեկչության մեջ մեղադրվող անձանց արտահանձնել, ինչպես նաև չեղարկել Անկարային զենքի մատակարարման արգելքը։
Մարտի սկզբին Անկարան հայտարարեց, որ պատրաստ է վավերացնել Ֆինլանդիայի թեկնածությունը մայիսին Թուրքիայում կայանալիք նախագահական ընտրություններից առաջ, սակայն Շվեդիայի դեպքում Թուրքիան առարկություններ ունի։
