ՏԵՍԱՆՅՈՒԹ․ Նոր կադրեր՝ Իսրայելից․ ավելի քան 100 000 ցուցարար մասնակցել է վարչապետի դեմ ցույցին

Անհանգիստ գիշեր Իսրայելում. բողոքի ակցիաները դատական ​​բարեփոխումների դեմ սրվել են: Վարչապետ Բենիամին Նեթանյահուն որոշել է պաշտոնանկ անել պաշտպանության նախարար Յոավ Գալանտին այն բանից հետո, երբ վերջինս դեմ է արտահայտվել օրենքին։ Նա ասել է, որ նորամուծությունը սպառնում է երկրի անվտանգությանը։ Իսրայելական լրատվամիջոցները հայտնում են, որ ցուցարարներից մի քանիսը հավաքվել են պաշտոնանկ քաղաքական գործչի տանը՝ նրան աջակցելու համար։

Իսրայելի ոստիկանությունը ցրել է հակակառավարական ինքնաբուխ ցույցի մասնակիցներին. ցույցը մի քանի ժամ շարունակվել է Թել Ավիվի արևելյան Այալոն մայրուղու վրա: Ցույցը ցրելու ժամանակ օգտագործվել են ջրցան մեքենաներ, ներգրավվել են հեծյալ ոստիկաններ. այս մասին, ՏԱՍՍ-ի փոխանցմամբ, հաղորդել է իսրայելական 13 հեռուստաալիքը։ 

Ցուցարարները մի քանի ժամ արգելփակել են մայրուղին, կրակ են վառել և պատրաստվում էին ճանապարհին մնալ առնվազն մինչև առավոտ։  Որոշ ակտիվիստներ սկսել են վրաններ տեղադրել ճանապարհի վրա։ Ցուցարարների թիվը, Crowd Solutions մասնավոր ընկերության գնահատականների համաձայն, հասել է 105 000-ի։

Ի վերջո բոլոր ցուցարարներին հաջողվել է ցրել։ Դրանից հետո ոստիկաններն ամբողջությամբ փակել են մուտքը դեպի մայրուղի։

Իսրայելում մարտի 26-ի երեկոյան սկսված ինքնաբուխ բողոքի ցույցերի պատճառը վարչապետ Բենիամին Նեթանյահուի՝ երկրի պաշտպանության նախարար Յոավ Գալանտին պաշտոնից հեռացնելու որոշումն էր։ 

Հայտնի է, որ  Նեթանյահուն պաշտոնանկ է արել պաշտպանության նախարար Յոավ Գալանտին մեկ օր անց այն բանից հետո, երբ վերջինս կոչ էր արել իշխող կոալիցիային սառեցնել դատաիրավական բարեփոխումների գործընթացը՝ նշելով, որ այն «պառակտում» է առաջացրել։ Այս մասին հաղորդել է Al Jazeera-ն՝ հղում անելով իսրայելական կառավարության գրասենյակի տարածած հաղորդագրությանը։

Գալանտը՝ Նեթանյահուի աջակողմյան «Լիկուդ» կուսակցության ներկայացուցիչը, դարձել է առաջինը բարձրաստիճան պաշտոնյան, որը շաբաթ ուշ երեկոյան կոչ էր արել 1 ամսով սառեցնել Իսրայելի դատական համակարգը բարեփոխելու վիճահարույց օրենսդրական գործընթացը մոտ 200 000 քաղաքացու ներգրավմամբ տեղի ունեցած ցույցի ֆոնին։ Ըստ նրա՝ իրավիճակ սպառնալիք է Իսրայելի անվտանգության համար։

Կարճ հայտարարության մեջ Նեթանյահուի գրասենյակը հայտնել է, որ վարչապետը պաշտոնանկ է արել Գալանտին: Ավելի ուշ Իսրայելի վարչապետն իր թվիթերյան էջում գրել է, որ «մենք բոլորս պետք է ամուր կանգնենք մերժման դեմ»:

Գալանտն այս հայտարարությունից անմիջապես հետո թվիթերյան իր էջում գրել է, որ «Իսրայել պետության անվտանգությունը միշտ եղել և կմնա իմ կյանքի առաքելությունը»:

Իսրայելի արդեն նախկին պաշտպանութան նախարարի՝ գործընթացը դադարեցնելու կոչը ողջունել էր իսրայելական ընդդիմության առաջնորդ, նախկին վարչապետ Յաիր Լապիդը՝ այն որակելով «համարձակ ու կենսական քայլ Իսրայելի անվտանգության համար»։