ՏԵՍԱՆՅՈՒԹ․ Նախատեսում եմ ապրիլի վերջին այցելել Երևան և Բաքու․ Ֆրանսիայի ԱԳՆ ղեկավար
Ֆրանսիայի ԱԳ նախարար Քեթրին Կոլոննան ծրագրում է ապրիլին այցելել Հայաստան և Ադրբեջան։ Այս մասին նախարարը հայտնել է Ֆրանսիայի Սենատում ելույթ ունենալիս։
«Առաջին իսկ օրվանից Ֆրանսիան դատապարտել է Ադրբեջանի կողմից Լաչինի միջանցքի արգելափակումը։ Այս արգելափակումն ավելացնում է լարվածությունը։ Ես նախատեսում եմ ապրիլի վերջին այցելել Բաքու և Երևան՝ այդ ուղերձը փոխանցելու համար։ Ֆրանսիան միջոցներ է ձեռնարկում», – ասել է Կոլոննան։
Ֆրանսիայի ԱԳՆ ղեկավարը նշել է, որ Լեռնային Ղարաբաղը բավարար սնունդ չի ստանում, և «այն էլ՝ Կարմիր Խաչի շնորհիվ է, որին օգնում է Ֆրանսիան»։
«Անհրաժեշտ է վերականգնել ազատ տեղաշարժը Լաչինի միջանցքով և ավելի լավ ապահովել Լեռնային Ղարաբաղի մատակարարումը։ Ֆրանսիան չի խոսում, գործում է», - ասել է նա։
Հիշեցնենք, որ դեկտեմբերի 12-ի առավոտյան ժամը 10:30–ից ընդհատված է Շուշիի շրջանի Լիսագոր, Մեծ շեն, Հին շեն և Եղցահող գյուղերի կապը մայրաքաղաք Ստեփանակերտի հետ։ Քաղաքացիական հագուստներով մի խումբ ադրբեջանցիներ, բնապահպանական պատճառաբանությամբ փակել են Ստեփանակերտ-Գորիս մայրուղին:
