Տարածաշրջանի երկրների ղեկավարները խելամիտ են. նրանք երկխոսության տարբերակը կընտրեն. Իրանի ԱԳ փոխնախարար
«Իրանի արտաքին քաղաքականության առաջնահերթություններից է հարևանների հետ հարաբերությունների զարգացումը․ այս քաղաքականության մեջ Իրանի համար կարևորագույն նշանակություն ունի Հայաստանը»,- Երևանում լրագրողների հետ ճեպազրույցում ասել է Իրանի ԱԳ փոխնախարար Ալի Բաղերի Քանին․
«Իրանը կայուն դիրքորոշում ունի տարածաշրջանում կայուն խաղաղության հաստատման գործում։ Մեր հանդիպումների ընթացքում ընդգծել ենք, որ Իրանը միշտ վստահելի գործընկեր է խաղաղության և անվտանգության հաստատման գործում»,- ասաց Իրանի ԱԳ նախարարի տեղակալը։
Ըստ Բաղերիի` տարածաշրջանի երկրներն են խաղաղության երաշխավորը, և օտարերկրյա ուժերի ներկայությունը չի կարող խաղաղություն ապահովել:
«Ես ենթադրում եմ, որ տարածաշրջանի երկրների ղեկավարներն այնքան խելամիտ են, որ երկխոսության տարբերակը կընտրեն հարցերի լուծման համար։ Իրանն իր ողջ հնարավորությունը և պոտենցիալը կօգտագործի խաղաղ երկխոսությունների միջոցով խնդիրներին լուծում տալու համար»,- ասել է Բաղերին։
