Միմյանց դիմում ենք «Դուք»-ով. Շոլցը պատմել Է Պուտինի հետ ունեցած հեռախոսազրույցների մասին

Գերմանիայի կանցլեր Օլաֆ Շոլցը հայտնել է, որ չնայած Ուկրաինայում ռազմական գործողությունների վերաբերյալ «կարծիքների լուրջ տարբերություններին», Պուտինի հետ զրույցները միշտ քաղաքավարի են եղել: Գերմանիայի կանցլերը չի հավատում զինված հակամարտության շուտափույթ ավարտին: Տեղեկատվությունը փոխանցում է rbc.ru-ն:

Շոլցը Rheinische Post-ին տված հարցազրույցում պատմել է, որ պարբերաբար խոսել է Ռուսաստանի նախագահ Վլադիմիր Պուտինի հետ, որոշ դեպքերում բանակցությունները կարող էին տևել մեկ կամ մեկուկես ժամ:

Շոլցի խոսքով՝ երբեմն զրուցակիցները շփվել են գերմաներեն, երբեմն՝ թարգմանության միջոցով։ Կանցլերը նշել է, որ կողմերը քաղաքավարի երանգ են պահպանում և միմյանց դիմում են «Դուք»-ով, միևնույն ժամանակ, նա ընդգծել է, որ իրենց միջև պահպանվում են Ուկրաինայում ռազմական գործողությունների վերաբերյալ «կարծիքների լուրջ տարբերությունները»:

Շոլցը համոզված է, որ խաղաղությունը չի կարող լինել Ռուսաստանի պայմաններով, իսկ Ուկրաինան պետք է հնարավորություն ունենա պաշտպանելու երկրի տարածքային ամբողջականությունն ու անկախությունը։ Կանցլերի կարծիքով՝ հակամարտության ավարտն անհնար է առանց ռուսական զորքերի դուրսբերման։ Նա կոչ է արել պատրաստվել նրան, որ մարտական գործողությունները երկար կտեւեն, իսկ դրանց ավարտից հետո հետեւանքները երկար կզգան, «ամեն ինչ միանգամից նորմալ չի դառնա»: Սակայն, ըստ Շոլցի, Արեւմուտքի երկրները պետք է շարունակեն ռազմական գործողությունները դադարեցնելու ջանքերը։