«Թալիբան»-ի առաջնորդը հրամայել է աշխատանքից հեռացնել կառավարությունում գտնվող բոլոր հարազատներին
BBC-ն տեղեկությունը հայտնում է, որ «Թալիբան» շարժման առաջնորդ Հիբաթուլլա Ախունդզադեն աֆղան պաշտոնյաներին հրամայել է աշխատանքից հեռացնել իրենց հարազատներին, որոնց նրանք աշխատանքի են ընդունել կառավարական պաշտոններում:
Ախունդզադեի հրամանագրում ասվում է, որ պաշտոնյաները պետք է աշխատանքից ազատեն նշանակված որդիներին կամ ընտանիքի այլ անդամներին եւ հետագայում ձեռնպահ մնան հարազատներին աշխատանքի ընդունելուց։
Թալիբները պաշտոնանկ են արել որոշ բարձրաստիճան պաշտոնյաների, երբ նրանք վերցրել են իշխանությունը 2021 թվականին, իսկ մյուսները փախել են:
Պակիստանում գործող «Աֆղան իսլամական մամուլը» հաղորդում է, որ հրամանագիրը հաջորդել է լուրերին, որ թալիբների մի քանի բարձրաստիճան պաշտոնյաներ իրենց որդիներին պաշտոնների են նշանակել կառավարությունում:
Թալիբների կառավարության վերաբերմունքն էլ կանանց նկատմամբ զայրացրել է միջազգային հանրությանը եւ խորացրել երկրի մեկուսացումը, քանի որ տնտեսությունը փլուզվում է:
Ներկայումս Աֆղանստանի մեծ մասում աղջիկներին եւ կանանց արգելված է հաճախել միջնակարգ դպրոցներ եւ համալսարաններ։
