Կանադան, ԱՄՆ-ն, Ճապոնիան և Հարավային Կորեան՝ ընդդեմ Պեկինի և Մոսկվայի․ նոր քաղաքական համագործակցությո՞ւն կսկսվի
Օտտավան Տոկիոյին առաջարկել է քառակողմ գործընկերություն ձևավորել Վաշինգտոնի և Սեուլի հետ՝ Պեկինին և Մոսկվային հակազդելու համար, երկուշաբթի հայտնում է Kyodo լրատվական գործակալությունը՝ վկայակոչելով դիվանագիտական աղբյուրները։
Նրանց խոսքով՝ Կանադան նման առաջարկով հանդես է եկել Ճապոնիայի վարչապետ Ֆումիո Կիսիդայի՝ հունվարին Օտտավա կատարած այցի ժամանակ։
Ամերիկացի դիվանագետները պաշտպանում են Տոկիոյի և Սեուլի հետ համագործակցությունը խորացնելու Օտտավայի ծրագիրը, գրում է Kyodo-ն։
Կանադայի առաջարկը հիշեցնում է Ավստրալիայի, Հնդկաստանի, Ճապոնիայի և Միացյալ Նահանգների միջև քառակողմ Հնդկախաղաղօվկիանոսյան անվտանգության երկխոսությունը (QUAD), որը դիտվում է որպես տարածաշրջանում Չինաստանի աճող ազդեցության հակակշիռ, հայտնում է գործակալությունը:
Այն հիշեցնում է, որ Կանադան, Ճապոնիան և ԱՄՆ-ը Մեծ Յոթնյակի անդամներ են, որի գագաթնաժողովն այս տարի կանցկացվի մայիսին ճապոնական Հիրոսիմայում: Հարավային Կորեայի նախագահ Յուն Սեոկ Յոլը հրավիրվել է Ճապոնիայի իշխանությունների կողմից՝ որպես հյուր մասնակցելու։
Եթե Հարավային Կորեայի նախագահը գա Հիրոսիմա, Կանադայի առաջարկը կարող է արծարծվել գագաթնաժողովի շրջանակներում երկկողմ հանդիպումների ժամանակ, նշվում է զեկույցում։
Ճապոնիան, ըստ Kyodo-ի զրուցակիցների, Կանադայի իշխանություններին ասել է, որ հայեցակարգի իրականացման համար ժամանակ է պետք։
