Հայ-թուրքական սահմանը բացելու հետ կապված` Մարգարայի կամրջից նմուշառում են իրականացրել. Ժողովուրդ
2022 թվականի դեկտեմբերին, երբ Հայաստանի և Թուրքիայի ներկայացուցիչներից կազմված աշխատանքային խմբերը հանդիպել են Արարատի մարզում՝ հայ-թուրքական սահմանի մոտ, իրականացվել է նաև Մարգարայի կամրջի նմուշառում, գրում է «Ժողովուրդ» օրաթերթը։
Օրաթերթը գրավոր հարցում է ուղարկել ՀՀ արտաքին գործերի նախարարություն՝ խնդրելով հայտնել, թե ինչ աշխատանքներ են իրականացվել դեկտեմբեր ամսին, և ինչ փուլում է գտնվում հայ-թուրքական սահմանի բացման գործընթացը:
Ի պատասխան թերթի հարցման՝ ՀՀ ԱԳՆ լրատվության և դիվանագիտության վարչությունից պատասխանել են.
«ՀՀ-ի և Թուրքիայի միջև աշխատանքային խմբերի մակարդակով տեղի է ունենում հուլիսի 1-ի հանդիպումների արդյունքում ձեռք բերված պայմանավորվածությունների կյանքի կոչման գործընթաց: Այդ համատեքստում իրականացվել է նաև Մարգարայի կամրջի նմուշառում»:
Թերթը տեղեկացել է նաև, որ առայժմ հայտնի չէ, թե Հայաստանի և Թուրքիայի ներկայացուցիչների առաջիկա հանդիպումը երբ կկայանա, քանի որ այժմ աշխատանքներ են իրականացվում ` ավելի վաղ ձեռք բերված պայմանավորվածությունները կյանքի կոչելու համար, և հետո միայն նոր հանդիպման շուրջ պայմանավորվածություն ձեռք կբերվի: