Նա նույնն է, նույն տղան, որին ես հանդիպեցի, երբ տասնյոթ տարեկան էինք․ Ելենա Զելենսկայան շնորհավորել է ամուսնուն

Ուկրաինայի առաջին տիկին Ելենա Զելենսկայան ֆեյսբուքյան էջում ամուսնուն՝ նախագահ Վլադիմիր Զելենսկիին նվիրված գրառում է արել: Նշենք, որ այսօր Ուկրաինայի նախագահի ծննդյան օրն է։ 

 

Զելենսկայան նշել է, որ Ուկրաինայում պատերազմի սկսվելուց գրեթե մեկ տարվա ընթացքում ամուսինը, ինչպես և ինքը, չի փոխվել:

«Նա նույնն է։ Նույն տղան, որին ես հանդիպեցի, երբ տասնյոթ տարեկան էինք: Բայց իրականում ինչ-որ բան փոխվել է՝ դու հիմա շատ ավելի քիչ ես ժպտում: Օրինակ՝ ինչպես այս լուսանկարում։ Մաղթում եմ քեզ ժպտալու ավելի շատ առիթներ։ Եվ դու գիտես, թե դրա համար ինչ է պահանջվում: Մենք բոլորս դա գիտենք: Դու բավականաչափ համառություն ունես։ Գլխավորը բավարար առողջություն ունենալն է։ Այնպես որ, խնդրում եմ առողջ եղիր: Ես ուզում եմ միշտ ժպտալ քեզ հետ: Տո՛ւր ինձ այդ հնարավորությունը», - գրել է Զելենսկայան:

Նշենք, որ փետրվարի 24-ին կլրանա ռուս-ուկրաինական ռազմական գործողությունների մեկ տարին: Երկու կողմից հնչող հայտարարությունների համաձայն՝ Մոսկվան և Կիևը դեռ բավականին հեռու են հաշտության կնքումից: