«Կիևում իրավիճակը շատ ծանր է». Զելենսկու աշխատակազմի ղեկավար
Ուկրաինայում արձակվել է 85 հրթիռ: Այս մասին ասել է Ուկրաինայի նախագահ Վլադիմիր Զելենսկին: Նա նաև հաստատել է, որ ռուսական հրթիռային հարվածների մեծ մասը եղել է էներգետիկ ենթակառուցվածքների վրա։ Բացի այդ, Զելենսկին ասել է, որ սպասվում է ևս 20 հարված։
Ուկրաինայի նախագահի աշխատակազմի ղեկավար Անդրեյ Երմակն էլ իր հերթին Կիևի այսօրվա գնդակոծությունն անվանել է Ռուսաստանի պատասխանը G20 գագաթնաժողովում Վլադիմիր Զելենսկու ելույթին։
«Ռուսաստանը պատասխանում է Զելենսկու՝ G20-ի հզոր ելույթին նոր հրթիռային հարձակումով։ Ինչ-որ մեկը լրջորեն կարծում է, որ Կրեմլն իսկապես խաղաղությո՞ւն է ուզում։ Նա ցանկանում է հնազանդություն: Բայց վերջում ահաբեկիչները միշտ պարտվում են»,- գրել է Երմակը։
Նախագահի աշխատակազմի ղեկավարի տեղակալ Կիրիլո Տիմոշենկոն էլ ասել է. «Իրավիճակը կրիտիկական է։ Ամենաշատ հրթիռներն ընկել են երկրի կենտրոնում և հյուսիսում։ Մայրաքաղաքում իրավիճակը շատ ծանր է, ներդրվում են արտակարգ իրավիճակներում անջատումների հատուկ գրաֆիկներ։ Ukrenergo-ն ստիպված է արտակարգ անջատումներ սկսել»։
